दाङ । तुलसीपुरमा पहिलो चरणमा तीनसय बढीले रोजगार पाउने भएका छन् । उपमहानगरपालिकामा बेरोजगारमा सूचीकृत भएका दुई हजार दुई सय ८१ जनामध्ये ३२७ जनाले पहिलो चरणमा एक सय दिनको रोजगारी पाउने भएका हुन् ।
रोजगारीका लागि रूपान्तरण पहल आयोजना (युवारूप) बाट सय जनालाई रोजगारी दिन ५१ लाख ९२ हजार बजेट विनियोजन गरिएको छ । त्यसैगरी प्रधानमन्त्री रोजगार कार्यक्रमअन्तर्गत २२७ जनालाई एक करोड, १७ लाख ३६ हजार बजेट विनियोजन गरिएको तुलसीपुर उपमहानगरपालिकाअन्तर्गत प्रधानमन्त्री रोजगार कार्यक्रम संयोजक किरण गौतमले जानकारी दिए । रोजगारमा लाग्नेलाई दैनिक पाँच सय १७ रुपैयाँ ज्याला दिइनेछ ।
पहिलो चरणमा रोजगार पाउनेमा तुलसीपुर उपमहानगरपालिका वडा १ बाट १६ जना, २ बाट १३, ३ बाट २९, ४ बाट १०, ५ बाट ६, ६ बाट १८, ७ बाट ११, १० बाट १४, ११ बाट ४५, १२ बाट ११, १३ बाट १०३, १४ बाट १, १५ बाट १० , १६ बाट ४, १७ बाट ७, १८ बाट ७ र १९ नम्बर वडाबाट २२ जना छन् । उपमहानगरपालिकाका ८ र ९ नम्बर वडा रोजगारीको सूचीमा कोही छैन ।
तुलसीपुरमा बेरोजगारमा सूचीकृतका लागि साउन ८ देखि भदौ ७ गतेसम्म म्याद राखेर सूचना जारी गरिएको थियो । बेरोजगार छनोटका लागि आठवटा मापदण्ड बनाएर रोजगार व्यवस्थापन सूचना प्रणालीद्वारा स्वचालित विधिबाट छनोट गरिएको प्रधानमन्त्री रोजगार कार्यक्रम संयोजक गौतमले बताए ।
पहिलो चरणमा परकाले एक सय दिन काम गरिसकेपछि अन्य बेरोजगारलाई नम्बरका आधारमा पुनः एक सय दिनको रोजगारी दिइनेछ । यद्यपि अहिलेसम्म तुलसीपुर उपमहानगरपालिकामा काम पाउनेको सूचीमा परे पनि काम भने सुरु भएको छैन ।
