दाङ । दाङको तुलसीपुर उपमहानगरपालिका वडा नं. ११ नवलपुर निवासी ४५ वर्षीय कुमार विकको बाँया खुट्टा छुटिने गरि भएको आक्रमणमा संलग्न भएको आरोपमा दुईजनालाई पक्राउ गरी सार्वजनिक गरिएको छ ।
इलाका प्रहरी कार्यालय तुलसीपुरले शुक्रबार पत्रकार सम्मेलन गरि हत्यामा संलग्न भएको अरोपमा दुईजनालाई पक्राउ गरि सार्वजनिक गरेको हो । पक्राउ पर्नेमा तुलसीपुर उपमहानगरपालिका वडा नं. १६ उत्तर कुररीया निवासी २२ बर्षीय पवन चौधरी र तुलसीपुर १० पढ्ढा निवासी २४ बर्षीय अमृत चौधरी रहेका छन् । उनीहरुलाई ज्यान मार्ने उद्योगमा मुद्दा दर्ता गरी अनुसन्धान भइरहेको इलाका प्रहरी कार्यालय तुलसीपुरका प्रहरी नायब उपरीक्षक शिवबहादुर सिंहले बताए । उनीहरुको साथबाट एकथान खुर्पा, अभियुक्तले घटनामा संलग्न रहेको अवस्थामा लगाएका कपडाहरु बरामद गरेको छ ।
गम्भीर घाइते भएको विकको भारतको लखनउमा उपचार भइरहेको छ । कात्तिक १० गते दसैंको दिनको बेलुकी तुलसीपुर उपमहानगरपालिका वडा नं. १० गोलौरीमा पुकार पसलबाट पढ्ढातर्फ जाने सडकमा विकलाई आक्रमण गरिएको हो । भाञ्जाको विवाहबाट भोजमा सहभागी भइ एक्लै घरतर्फ जाँदै गरेको अबस्थामा बिकमाथि आक्रमण भएको प्रहरीले बताएको छ ।
उनको खुट्टाको पैतला छिनिएको छ, भने हातको हत्केला र ढाडमा चोट लागेको छ । घटनामा अन्य व्यक्तीहरु पनि संलग्न हुनसक्ने भन्दै यस विषयमा अनुन्धान भइरहेको उनको भनाइ छ । एकान्त स्थानमा घटना भएको र स्थानीयहरुले पनि केही कुरा बोल्न नमानेकाले अनुसन्धानमा समस्या भएको उनको भनाई छ ।
सोही दिन तुलसीपुर उपमहानगरपालिका वडा नं. १० गोलौरीस्थित आशिष चौधरीको घरमा नाचगान भइरहेको समयमा स्थानीय दुर्गा प्रसाद चौधरीसँग विवाद हुँदा झडप भएको थियो । आक्रमणको क्रममा सोही ठाउँका ४२ बर्षीय सुसिल चौधरीसहित ११ जना व्यक्तिले दुर्गा प्रसाद चौधरीको टाउको लगायत शरिरका बिभिन्न अंगहरुमा प्रहार गर्दा गम्भीर घाइते भएका थिए ।
उनको अहिले कोहलपुर उपचार भइरहेको छ । अवस्था सामान्य रहेको प्रहरीले बताएको छ । आक्रमणमा संलग्न ७ जनालाई प्रहरीले पक्राउ गरिसकेको छ भने अन्य फरार छन् । तुलसीपुर उपमहानगरपालिका वडा नं. १४ निवासी २२ वर्षीय विजय चौधरी, सोही ठाउँका २३ वर्षीय अशोक चौधरी, १८ वर्षीय तिलक चौधरी, २१ बर्षीय सुनिल चौधरी र २८ बर्षीय पवन चौधरी र १९ बर्षीय आशिष चौधरीलाई पक्राउ गरिएको छ ।
पक्राउ परेकाहरुमध्ये पवन चौधरी र अमृत चौधरी दुबै घटनामा संलग्न भएको पाईएको छ । नाचगान गर्ने क्रममा उत्पन्न विवादले नै यी दुई घटना निम्त्याएको प्रहरी नायब उपरीक्षक सिंहले बताए । एक घण्टाको फरकमा यी दुई घटना भएका थिए । आसपासमा प्रहरी चौकी नहुँदा पनि त्यस स्थानमा अपराधिक गतिबिधिहरु बढिरहेको उनको भनाइ छ ।
