जनकपुर । प्रदेश २ मा पछिल्लो १० दिनको तथ्यांकले नयाँ संक्रमितभन्दा सात गुणा बढी संख्यामा कोरोनामुक्त भइरहेको देखाएको छ । प्रदेशको सामाजिक विकास मन्त्रालयले अपडेट गरिरहेको तथ्यांकअनुसार असोज छ गते कुल संक्रमितको संख्या १३ हजार ७१ थियो । उक्त मितिसम्म संक्रमितमध्ये जम्मा सात हजार एक सय १९ जना कोरोनामुक्त भएका थिए । 

त्यसको १० दिनपछि अर्थात् असोज १७ गते संक्रमितको संख्या पाँच सय ८५ ले बढेर १३ हजार सात सय ४७ पुगेको छ भने कोरोनामुक्त हुनेको संख्या तीन हजार नौ सय पाँचले वृद्धि भई ११ हजार १४ पुग्यो । यो १० दिनमा नयाँ संक्रमित र कोरोनामुक्त हुनेको अन्तर करिब सात गुणाभन्दा बढीको अन्तर हो ।   पछिल्लो १० दिनको अवधिमा १५ जनाको मृत्यु भएको छ । १० दिन अघिसम्म एक सय २२ जनाको मृत्यु भएको प्रदेशमा शुक्रबारसम्म मृतकको संख्या एक सय ३७ पुगेको हो । 

एक महिना अगाडि प्रदेशमा कुल संक्रमितको तुलनामा कोरोनामुक्त हुनेको संख्या आधाभन्दा पनि कम थियो ।  भदौ १६ गते मन्त्रालयले जारी गरेको तथ्यांकअनुसार कोरोनामुक्त संख्याको तुलनामा सक्रिय केस बढी थियो ।  उक्त मितिमा कुल संक्रमितको संख्या १० हजार तीन सय छ थियो भने चार हजार नौ सय ८८ जनामात्र कोरोनामुक्त भएका थिए । 

प्रदेशमा संक्रमितको संख्या दैनिक तीन अंकले बढिरहेको बेला एक र कहिलेकाहीँ मात्र दुई अंकले कोरोनामुक्त भइरहयो ।  यस्तो क्रम लामो समयसम्म निरन्तर चल्यो । पछिल्लो १० दिनयता भने अवस्था फेरियो र संक्रमितको संख्या दैनिक दुई अंकमा सीमित हुनपुग्यो । सोही अवधिमा कोरोनामुक्त हुनेको संख्या चार अंकसम्म पुग्न थाल्यो । 

जस्तो कि असोज १२ गते संक्रमितको संख्या ३६ मा सीमित हुँदा सोही दिन कोरोनामुक्त हुनेको संख्या नौ सय ८७ पुग्यो ।  त्यसको भोलिपल्ट अर्थात् असोज १३ गते ४९ जनामा कोरोना संक्रमण पुष्टी भयो । उक्त दिन एक हजार दुई सय नौ जना कोरोनामुक्त भए । 

घटेकै हो त कोरोना संक्रमण दर ?

“हो, घटेकै हो । तर, यो क्रमको निरन्तरता दिन नागरिक र प्रशासन दुवै पक्ष निकै सचेत रहनु आवश्यक छ” नारायणी अस्तालका मेडिकल सुपरिटेन्डेन्ट (मेसु) डा. सञ्जय ठाकुरले बाह्रखरीसँग भने । पछिल्लो समय भारतीय सीमा कडाइसाथ नियन्त्रणमा राखियो । नागरिकमा पनि एक प्रकारको डरले गर्दा अधिकत्तम सतर्कता अपनायो भने राज्यले कोरोना संक्रमणको जोखिम घटाउन हदैसम्मको कडाइ गर्‍यो । 

यसले गर्दा वास्तवमै नयाँ संक्रमितको संख्यामा कमी आउन थालेको उनको भनाई छ । 

“तर, अब आउन लागेको दशैं र तिहारमा कोरोना गल्यो वा हरायो भन्ने भ्रम नागरिकमा पर्न नजाओस् नि फेरि !” डा. ठाकुर भन्छन्, “अहिले नागरिकस्तरमा चेतना बढ्यो र डर पनि छ । त्यसैले धेरै हदसम्म जोखिम न्युनिकरण भइरहेको छ । नयाँ संक्रमित कम भएपछि समयमै आइसोलेट गर्ने, कन्ट्याक्ट कम हुँदा कम व्यक्तिको मात्रै जाँच गर्नुपर्ने र समयमै रिपोर्ट आउने हुँदा धेरै हदसम्म नियन्त्रण हुँदैछ । तर, नागरिकमा रहेको भय मुक्त भयो भने फेरी यो अवस्था नियन्त्रण बाहिर जान सक्दैन भन्न सकिँदैन ।”

सकेसम्म घर बाहिर ननिस्किने, निस्किनै परे मास्क अनिवार्य रुपमा लगाउने र दुरी कायम गर्ने बानी सँधैको लागि बसाल्नुपर्ने उनको भनाई छ ।  डा. ठाकुरले कोरोनालाई एचआइभीसँग तुलना गर्दै भने, “एचआइभी सुरुमा महामारीको रुपमा आयो । अहिले शान्त भएको जस्तो त छ । तर, सर्दै सर्दैन, छँदैछैन त भन्न मिल्दैन नि !” 

उनले थपे, “कोभिड १९ (कोरोना) लाई पनि त्यसरी नै सम्झिनुपर्छ । यसको प्रभाव मत्थर हुन सक्छ तर तत्कालै समाप्त हुँदैन भनेर हामीले नागरिकस्तरमा बुझाउनुपर्ने जरुरी छ ।”  कोरोनाको संक्रमण जोखिम न्युनिकरण गर्ने उपाय अबको दुई तीन वर्षसम्म नै अपनाइरहनुपर्ने र दुई तीन महिनासम्म त यसका लागि राज्यले समेत कडाइ गर्नुपर्ने उनले सुझाए ।