जनकपुर । प्रदेश २ को सर्लाही र सप्तरीमा कोरोना लागेका दुई जनाको मृत्यु भएको छ । 

सर्लाहीको बरहथवा नगरपालिका –६ का ६६ वर्षीय र सप्तरीको कृष्णासावरण नगरपालिका –४ का ३९ वर्षीयसमेत दुई जनाको बुधबार कोरोनाको कारण मृत्यु भएको सामाजिक विकास मन्त्रालयले पुष्टि गरेको छ । 

पछिल्लो २४ घण्टामा प्रदेशका विभिन्न जिल्लामा ४९ जनालाई कोरोना संक्रमण भएको मन्त्रालयले जनाएको छ । धनुषामा छ जना, महोत्तरीमा तीन जना, सिरहामा १३ जना, बारामा नौ जना, पर्सामा १२ जना, रौतहटमा एक जना, सप्तरीमा एक जना र जिल्ला खुल्न नसकेका अन्य चार जनामा कोरोना संक्रमण भएको हो ।

बुधबार विभिन्न जिल्लाका पाँच सय ९७ जना संक्रमित विभिन्न अस्पताल, आइसोलेशन तथा होमआइसोलेशनबाट डिस्चार्ज भएका छन् । प्रदेशमा कुल संक्रमितको संख्या १३ हजार पाँच सय २७ जना पुगेकोमा एक सय ३३ जनाको मृत्यु भएको छ भने १० हजार पाँच सय ४२ जना कोरोनामुक्त भएको मन्त्रालयले जनाएको छ ।