काठमाडौं । नेपाली कांग्रेसमा तेस्रो धारको नेतृत्व गर्दै आएका पूर्वमहामन्त्री कृष्णप्रसाद सिटौला संस्थापन र संस्थापनइतर समूहबीच चुलिएको तिक्तता मेटाउन सक्रिय देखिएका छन् । गृहजिल्ला झापाबाट संघीय राजधानी काठमाडौं फर्किएलगत्तै उनी सभापति शेरबहादुर देउवा र वरिष्ठ नेता रामचन्द्र पौडेलबीच पछिल्लो समय चुलिएको तिक्तता मेटाउन सक्रिय भएका हुन् ।
वरिष्ठ नेता पौडेलको समूहले विधानविपरीत गरिएका भनिएका पछिल्ला निर्णयहरु फिर्ताका लागि सभापति देउवालाई दबाब दिन मौखिक र लिखित रुपमा ध्यानाकर्षपत्र बुझाउनेदेखि आमरण अनशन बस्नेसम्मका दबाबमूलक कार्यक्रम अघि बढाउने तयारी गरिरहेका बेला नेता सिटौला दुवै पक्षलाई मिलेर जानुपर्ने दबाब सिर्जना गरिरहेका छन् ।
उनले शनिबार सभापति देउवा र आइतबार वरिष्ठ नेता पौडेललाई भेटेर सहमतिका साथ अगाडि बढ्नुपर्ने र महाधिवेशनका लागि गरिने निर्णयहरु सर्वसम्मत गर्नुपर्ने सल्लाह दिएका छन् । नेता सिटौलाले सभापति देउवा र वरिष्ठ नेता पौडेललाई भेटेको उनको सचिवालयले पुष्टि गरेको छ ।
“आज बिहान रामचन्द्र निवासमा उहाँहरुबीच भेट भएको हो । हिजो बूढानीलकण्ठमा सभापतिसँग पनि भेट भएको थियो,” सिटौलाको सचिवालय स्रोतले भन्यो, “उहाँ (सिटौला) झापाबाट फर्किएपछि पार्टीमा देखिएको विवाद कसरी समाधान गरेर सहमतिका साथ अगाडि बढ्न सकिन्छ भनेर नेताहरुसँग भेटघाट गरिरहनुभएको छ ।”
संस्थापन पक्ष र पौडेल समूहको बीचमा देखिँदै आएका विवाद समाधानका लागि सिटौलाले यसअघि पनि मध्यमार्गी भूमिका निभाइसकेका छन् । बहुमतका आधारमा पार्टीको विधान पारित गर्दै महाधिवेशनको मिति तोकिएपछि चिढिएको पौडेल समूह र सभापति देउवाका बीचमा मध्यस्थता गरेर सर्वसम्मत रुपमा महाधिवेशनको मिति तय गराएका थिए ।
तर, केन्द्रीय कार्यसमितिले सर्वसम्मत निर्णय गरेको मितिमा कांग्रेसको महाधिवेशन सम्पन्न हुने सम्भावना क्षीण बन्दै गएको छ । संस्थापन पक्षले कोरोना महामारीलाई देखाएर महाधिवेशनको कार्यतालिका प्रभावित भएको बताइरहेको छ भने पौडेल समूह सभापति देउवाले महाधिवेशन गर्नै नचाहेको आरोप लगाइरहेको छ ।
महाधिवेशनलाई प्रभावित गर्ने गरी सभापति देउवाले समायोजन, विभाग, क्रियाशील सदस्यता र भ्रातृ संस्थामा मनोमानी गरेको दाबी गर्दै पौडेल समूहले चरणबद्ध आन्दोलनको घोषणा गरेर आइतबार हस्ताक्षरसहित विरोधपत्र पार्टी कार्यालयमा दर्ताको तयारी गरेको छ ।
देउवाविरुद्धको अभियानमा पौडेललाई सिटौलाले साथ नदिने
सभापति देउवा र वरिष्ठ नेता पौडेलबीच महाधिवेशनको विषयमा मतान्तर बढेपछि पूर्वमहामन्त्री सिटौला दुवैलाई मिलाउन प्रयासरत छन् । “सर्वसम्मत रुपमा तोकिएको मितिमा महाधिवेशन सार्ने, अथवा यो हुँदैन भन्ने पक्ष र जसरी पनि गर्नुपर्छ, सम्भव छ भन्ने पक्षलाई एउटै विन्दुमा ल्याएर मिलाउने कोसिस गरिरहनुभएको छ,” सिटौलाको सचिवालयले भन्यो ।
सचिवालयले नेता सिटौला पौडेल समूहले सभापति देउवाविरुद्ध सञ्चालन गर्ने आन्दोलनमा भने सहभागी नहुने प्रस्ट पारेको छ । “पार्टीलाई संस्थागत रुपमा लिएर जाने, विवादरहित वातावरण बनाएर अधिवेशन सम्पन्न गरेर पार्टीलाई मजबुत बनाउने ध्यानमा हुनुहुन्छ,” सचिवालय स्रोतले भन्यो, “उहाँ कसैसँग पनि मिल्नुहुन्न् । न सभापतिसँग न वरिष्ठ नेतासँग । एउटा पक्षसँग मिलेर जाने कुनै सम्भावना छैन ।”
