जनकपुर । प्रदेश २ को धनुषामा शुक्रबार कोरोना लागेका दुई जना वृद्धको मृत्यु भएको छ । 

जिल्लाको सबैला नगरपालिका –३ घर भएका ६८ वर्षीय र बटेश्वर गाउँपालिका –५ घर भइ जनकपुर –२ मा बसिरहेका ७० वर्षीय पुरुषको मृत्यु भएको सामाजिक विकास मन्त्रालयले पुष्टि गरेको छ ।

शुक्रबार प्रदेशका विभिन्‍न जिल्लामा एक सय ४० जनामा कोरोना संक्रमण भएको मन्त्रालयले जनाएको छ । धनुषमा छ जना, महोत्तरीमा एक जना, सिरहामा आठ जना, बारामा ७७ जना, पर्साका १५, रौतहटका चार जना र सप्तरीका २९ जनामा संक्रमण भएको हो । 

प्रदेशमा मृतकको संख्या एक सय १५ पुगेको छ । धनुषामा १५, महोत्तरीमा १३, सिरहामा ११, सप्तरीमा ९, सर्लाहीमा चार, रौतहटमा पाँच, बारामा १७ र पर्सामा ४० जनाको मृत्यु भएको हो ।