जनकपुर । प्रदेश २ स्थित भारतीय भूमिसँग जोडिएको सीमा नाका सुरक्षाको लागि महोत्तरीको बर्दिवासमा सशस्त्र प्रहरीले ‘रिजर्भ गण’ स्थापना गरेको छ । 

बर्दिवास स्थित सशस्त्र प्रहरी बल नेपाल प्रदेश-२ छिन्‍नमस्ता बाहिनी कार्यालयमा सशस्त्र प्रहरी बल नेपाल नम्बर ३९ ‘रिजर्भ गण’ को हेड क्वाटर स्थापना गरिएको हो । बाहिनीपति डिआईजी कृष्णभक्त ब्रम्हचार्यले बिहीबार एक कार्यक्रमबीच ‘रिजर्भ गण’ को स्थापना भएको जानकारी दिए ।

रिर्जभ गणले सीमा नाकाको सुरक्षा, त्यसको व्यवस्थापन र आवश्यक जनशक्ति परिचालनको लागि काम गर्न भन्दै नेपाल सरकारको मन्त्रिपरिषद बैठकले गत असार २९ गते ‘रिर्जभ गण’ स्थापना गर्ने निर्णय गरेको हो । गणले विपद व्यवस्थापन, राहत तथा उद्धार, सीमामा हुने क्रियाकलापहरुको निगरानी लगायत काम गर्ने ब्रम्हचार्यले बताए । 

बर्दिबासस्थित उक्त गणमा एसपी सुरेन्द्र बुढाथोकीको नेतृत्वमा ६ सय २१ जना जनशक्ति परिचालन हुनेछन् । गणले सीमा नाकामा थपिने वीओपीहरुमा जनशक्ति परिचालन र व्यवस्थापन गर्ने एसपी बुढाथोकीले जानकारी दिए । प्रदेश २ का ८ वटै जिल्ला भारतीय सीमासँग जोडिएको छ । प्रदेशभर ४ सय ६४ किलोमिटरको नेपाली भू–भाग भारतसंग जोडिएको छ । 

आठ जिल्लाबाट भारत प्रवेश गर्ने २ सय ४६ ठूला-साना सीमानाका रहेका छन् । सीमा सूरक्षाको लागि प्रदेश २ अन्तर्गत सिरहा, सप्तरी, धनुषा, महोत्तरी, सर्लाही र बारामा नयाँ बीओपीहरु थप गरिने प्रदेश २ छिन्‍नमस्ता बाहिनी कार्यालयले जनाएको छ । 

सशस्त्र प्रहरी बलले रिर्जभ गण स्थापना तथा वीओपीका थप पोष्ट र जनशक्ति बढाएसँगै सीमा क्षेत्रमा हुने आपराधिक क्रियाकलाप नियन्त्रणमा आउने डिआइजी ब्रम्हचार्यले विश्वास व्यक्त गरे ।