जनकपुर । प्रदेश २ मा बिहीबार ७१ जना नयाँ व्यक्तिमा कोरोना संक्रमण पुष्टि भएको छ । ती मध्ये ५० जना पर्सामै छन् । 

बिहीबार पर्साको वीरगंज महानगरपालिका वडा नम्बर ४ र १२ मा तीन वर्षीया बालिकासमेत तीन देखि ६० वर्ष उमेर समूहका २६ जनामा कोरोना संक्रमण पुष्टी भएको छ । 

त्यस्तै, वीरगंजस्थित नारायणी अस्पतालका पाँच जना महिलासमेत १५ जना, नेपाली सेनाको शिविर र विर्ताका दुई–दुई जना, पर्साको सुगौली गाउँपालिकाका तीन जना तथा छिपहरमाई गाउँपालिका र जगरनाथपुर गाउँपालिकाका एक–एक जनामा कोरोना संक्रमण भएको सामाजिक विकास मन्त्रालयले पुष्टी गरेको छ ।

बाराको जीतपुर स्वास्थ्यचौकी क्वारेन्टाइनका दुई र कलैया उपमहानगरपालिकाका एक जना, महोत्तरीको बर्दिबास नगरपालिकाका तीन र एकडरा नगरपालिकाका एक जना तथा धनुषाको जनकपुरधाम उपमहानगरपालिकाका पाँच जना, शहीदनगर नगरपालिकाका एक जना, एकमला नगरपालिकाका एक जना, मिथिला नगरपालिकाका पाँच जना, ठाउँ खुल्न नसकेको एक जना र पुर्व नवलपरासी, गैंडाकोटका एक जनामा कोरोना संक्रमण पुष्टी भएको हो । 

बिहीबारसम्म प्रदेश २ मा कोरोना संक्रमितको संख्या चार हजार छ सय १५ जना पुगेको छ भने तीन हजार ६९ जना अस्पतालमा उपचारपछि निको भएर घर फर्केका छन् ।