एजेन्सी । दिवंगत अभिनेता सुशान्तसिंह राजपूतको जीवनीसँग प्रेरित चलचित्र ‘सुसाइड और मर्डर’ को फर्स्ट लुक पोस्टर सार्वजनिक भएको छ ।
चलचित्रमा सुशान्तको भूमिकामा टिकटक स्टार सचिन तिवारीलाई देख्न सकिनेछ । रिलिज पोस्टरमा सचिनको दायाँ अनुहारपट्टि कालो देखाइएको छ भने बायाँपट्टि भने प्रस्टले देखाइएको छ ।
सचिनको अनुहार सुशान्तसँग मिल्न थालेसँगै सामाजिक सञ्जालमा उनी भाइरल भइरहेका छन् । चलचित्र निर्माता विजय शेखर गुप्ताका अनुसार स्क्रिप्टको ५० प्रतिशत काम सकिसकेको छ । यसको पूरा काम अगस्तसम्म सकिनेछ । उनका अनुसार १६ सेप्टेम्बरदेखि पन्जाबमा छायांकन हुनेछ ।
यो चलचित्र बलिउडमा फैलिएको नेपोटिजम र बलिउड माफियाको मिथलाई तोड्न बनाइएको निर्माता गुप्ताको दाबी छ ।
उनले अगाडि भने, “यस्तो घटनाको सिकार भएका बलिउड कलाकारमा सुशान्त पहिलो होइनन् । चलचित्रमा ९ देखि १० कलाकारको कथा समावेश हुनेछ । चलचित्र ३ घण्टाको हुनेछ । सुशान्तको आत्महत्याको केसमा सोधपुछ गरिएका केही प्रेरित क्यारेक्टरलाई पनि चलचित्रमा प्रस्तुत गरिनेछ ।”
निर्माता गुप्ताले पछि छायांकनमा कुनै पनि रोकतोक नहोस् भनेर सम्पूर्ण कानुनी पक्षमा कुरा गरिसकेका छन् । उनले सुशान्तको जीवनीबाट प्रेरित मात्रै हुने र कुनै किसिमको बायोपिक नभएर अरू पात्रहरूको कथा पनि समावेश हुनेमा जोड दिए । (नवभारत टाइम्स)