काठमाडौं । आम नागरिक कोरोना भाइरसको संक्रमणबाट प्रभावित भएको अवस्थामा डिजिटल माध्यमबाट ‘गाईजात्रा विशेष कार्यक्रम’हुने भएको छ ।
उत्प्रेरणा र हौसलाको सांस्कृतिक पर्व गाईजात्राको अवसर पारेर ब्राण्ड वर्थ प्रालिले आयोजना गर्न लागेको यो कार्यक्रम विभिन्न टेलिभिजन तथा डिजिटल प्लेटफर्महरु मार्फत प्रसारण हुंदैछ । साउन १५ गतेदेखी सरकारले अपनाएको मापदण्ड भित्र रहेर डिजिटल माध्यमबाट मनोरञ्जन प्रदान गर्न लागिएको आयोजक ब्राण्डवर्थ प्रालिका प्रमुख कार्यकारी निर्देशक मोहन गजुरेलले जानकारी दिए ।
विश्व नै कोरोनाभाइरसको संक्रमणबाट प्रभावित भएको अवस्थामा आम मानिसमा देखिएको मनोसामाजिक असर न्यूनीकरणमा मद्धत पुर्याउने मनोबैज्ञानिक थेरापीको रुपमा यो कार्यक्रम प्रत्येक नेपालीको घरघरमै पुग्ने गरी अनलाइन माध्यम रोजिएको गजुरेलको भनाइ छ ।
कलाकार मनोज गजुरेलका बिभिन्न प्रश्तुतीमध्ये विश्व स्वास्थ्य संगठन डब्लूएचओका प्रमुख टेड्रोस अधानोम गेब्रेयेससको नक्कलकोे टिजर सार्वजनिक भइसकेको छ । मनोज गजुरेल भन्छन् “यो बेलाजोसँग जे विज्ञता छ, उसले त्यही धर्म निर्वाह गर्ने हो । यसमा हामीले महामारीबाट अन्योलग्रस्त र त्रसित मनहरुलाई हौसला र उत्पेरित गर्ने प्रयास गरेका हौं ।” कार्यक्रममा शैलेन्द्र सिंखडा, यमन श्रेष्ठ, पशुपती शर्मा, चट्याङ मास्टर, अर्जुन पराजुली, लक्ष्मण गाम्नागे, सिताराम कट्टेल, कुञ्जना घिमिरे, राजा राजेन्द्रको पनि प्रस्तुती रहनेछ ।
यस्तै कमेडी च्याम्पियन हिमेश पन्त, सुमन कोइराला, खड्गबहादुर पुन, मेक्सम गौंडेल, सुमन कार्की लगायतको प्रस्तुती रहने छ ।