काठमाडौं । अहिलेको अवस्थामा कसरी सेयर बजार खोल्ने भन्ने विषयमा अध्ययन गर्न गठित समिति पनि नयाँ कम्पनी खोल्ने विषयमा केन्द्रित भएको छ । 

धितोपत्र बोर्डले गठन गरेको अध्ययन समितिको हालसम्म दुईवटा बैठक बस्यो छ । ती दुवै बैठकमा नयाँ कम्पनी खोल्ने विषयमा छलफल केन्द्रित भएको छ । बुधबार र बिहीबार बसेको बैठकले सेयर बजारलाई पूर्ण अनलाइन बनाउन नयाँ कम्पनी खोल्ने विषयमा छलफल केन्द्रित गरेको थियो ।

छलफलमा सहभागी बोर्डका अधिकारीले नयाँ कम्पनीको आवश्यकता र त्यसको पुँजीलगायतको विषयमा आफ्नो भनाइ राखेको छलफलमा सहभागी एक समिति सदस्यले बाह्रखरीलाई बताए । पुँजीबजार खोल्ने विषयमा अध्ययन गर्न बनेको समितिमा समेत नेप्सेको अनलाइन कारोबार प्रणालीलाई स्वचालित बनाउन नयाँ कम्पनीले खोल्ने विषयमा छलफल हुनुले बोर्ड नै नयाँ कम्पनी भित्र्याउन लागिपरेको प्रस्ट हुन्छ ।

ठूला स्टक मार्केटमा क्लियरिङ हाउस छुट्टै हुने जानकारहरू बताउँछन् । यदि नयाँ क्लियरिङ हाउस खोल्ने हो भने अहिलेको सीडीएस एन्ड क्लियरिङलाई छुट्याउनुपर्ने जानकारहरू बताउँछन् । बोर्डले गठन गरेको समितिमै नयाँ कम्पनी चाहिने विषयमा छलफल भए पनि कस्तो कम्पनी भन्ने स्पष्ट नभएको उनले बताए । बाह्रखरीलाई प्राप्त जानकारीअनुसार नेप्सेको अनलाइन कारोबार प्रणालीलाई स्वचालित बनाउन बैंक इन्ट्रिग्रेसन र टीएमएसको लागि नयाँ कम्पनी भित्र्याउने तयारी भएको र त्यसका लागि बोर्डमा प्रिजेन्टेसनसमेत भइसकेको छ ।

सेयर बजारमा सधैँ चलखेल ! प्रधानमन्त्रीकै सल्लाहकारको अर्को कम्पनी घुसाउने प्रयास 

सोही कम्पनी भित्र्याउने उद्देश्यले नै अहिलेको अनलाइन कारोबार प्रणाली पूर्ण नभएको भन्ने देखाउन सरकारी तवरबाटै सेयर बजार बन्द गराएको बताइन्छ । यसका लागि प्रधानमन्त्रीका सूचना प्रविधि सल्लाहकार अस्गर अली तथा अर्थमन्त्रीका स्वकीय सचिव तुलसी मैनाली लागिपरेको स्रोतको दाबी छ । अस्गर अलीले सीडीएस एन्ड क्लियरिङका पूर्वकर्मचारीको सहयोगमा सिस्टम बनाएको र त्यसलाई अहिलेको अनलाइन कारोबार प्रणालीमा जोड्न लागिपरेको स्रोतको दाबी छ ।

नेप्सेको अहिलेको अनलाइन कारोबार प्रणालीको विषयमा गत असार ३ गते नेपाल धितोपत्र बोर्डले नेप्सेलाई साउन १ बाट स्वचालित बनाउन निर्देशन निर्देशन दिएको थियो । सोही दिन प्रधानमन्त्रीको सूचना प्रविधि सल्लाहकार अस्गर अलीले नेपाल धितोपत्र बोर्ड नयाँ सिस्टमको प्रिजेन्टेसनसमेत दिएका थिए ।  

अनलाइन कारोबार प्रणालीमा अहिलेको बैंक इन्ट्रिग्रेसन नै पूर्ण भएको दाबी नेप्सेले गर्दै आएको छ । यता धितोपत्र बोर्डले भने सम्पूर्ण प्रक्रिया स्वचालित नहुँदासम्म पूर्ण भन्न नमिल्ने बताउँदै आएको छ । अहिलेको अनलाइनलाई असफल बनाएर नयाँ सिस्टम ल्याउन चलेखेल गर्नेले नै अनलाइन सिस्टम पूर्ण नभएको बताउने गरेको नेप्से स्रोतको दाबी छ ।

नेप्से स्रोत भन्छ, “प्रधानमन्त्रीका सूचना प्रविधि सल्लाहकार अस्गर अली र अर्थमन्त्रीका स्वकीय सचिव सचिव तुलसी मैनाली नयाँ अनलाइन कारोबार प्रणालीमा नयाँ कम्पनी भित्र्याउने विषयमा आएर पटक–पटक छलफल गरिहनुभएको छ ।”

साउन १ गतेबाट स्वचालित अनलाइन प्रणाली सञ्चालन गर्न बोर्डले दिएको निर्देशनमा नेप्सेले संसारमा टी–प्लस शून्यमा सेटलमेन्ट हुने प्रविधि कहीं पनि नभएको भन्दै जवाफ पठाएको नेप्से स्रोतले जानकारी दियो ।

नेप्सेले यदि टी–प्लस शून्यमै सेटलमेन्ट गर्ने हो भने पनि त्यो पोस्ट ट्रेडिङको प्रक्रिया भएकोे जवाफ बोर्डलाई पठाएको छ । धितोपत्र सूचीकरण तथा कारोबार नियमावलीमै सेटलमेन्टको काम सीडीएस एन्ड क्लियरिङ र ब्रोकरले गर्ने र त्यसमा कुनै समस्या आएमा बोर्डले ब्रोकर र सीडीएसलाई निर्देशन दिनेछ भन्ने उल्लेख भएकोले उता निर्देशन दिन भनेको नेप्से स्रोतले दाबी गरेको छ ।

यता धितोपत्र बोर्डका अध्यक्षले बैंक इन्ट्रिग्रेनका लागि नयाँ कम्पनी खोल्न अनुमति दिन सकिने यसअघि नै बाह्रखरीसँगको कुराकानीमा बताइसकेका छन् । बोर्डले गठन गरेको अध्ययन समितिको संयोजक बोर्डका कार्यकारी निर्देशक परिष्ठनाथ पौडेल छन् । यस्तै सदस्यहरूमा बोर्डका उप–कार्यकारी निर्देशक नवराज अधिकारी र विनयदेव आचार्य, नेप्सेबाट नीरञ्जन फुयाँल, सीडीएस एन्ड क्लियरिङबाट कञ्चन सापकोटा, ब्रोकरबाट भरत रानाभाट र लगानीकर्ताहरूका तर्फबाट नयन बास्तोला र छोटेलाल रौनियार छन् ।