एजेन्सी । ओलम्पिक गोल्ड मेडल जित्नु कुनै पनि खेलाडीका लागि ठूलो सपना हो । आफ्नो घाँटीमा पदक लगाउँदै पोडियममा उभिएर आफ्नो देशको झन्डा सबैभन्दा माथि राख्दै र देशको राष्ट्रियगान सुन्नुभन्दा बढी सुखदको अनुभव सायदै अरू कुनै होला । 

विश्वका हरेक कोही खेलाडी यो क्षणका लागि आफ्नो सबैथोक दाउमा लगाउन तयार हुन्छन् । तर, कोही यस सम्मानलाई स्वयं आफैं आफ्नो जीवनबाट टाढा राख्न सक्छ र ?

कुनै पनि खेलाडीलाई यस्तो ठूलो कदम चाल्दा उसमा कस्तो बित्छ होला, हामी कल्पना पनि गर्न सक्दैनौं । तर, एक चर्चित खेलाडी मोहम्मद अलीले ओलम्पिकको गोल्ड मेडललाई नदीमा फालिदिएका थिए । उनले ओलम्पिक गोल्ड मेडल १९६० को रोम ओलम्पिकमा जितेका थिए ।

बक्सर खेलाडी अलीले आफ्नो करियरमा ६१ अन्तर्राष्ट्रिय ‘फाइट’ खेलेका थिए । जसमा उनले मात्र पाँच फाइट हारेका थिए । १८ वर्षको उमेरमा उनले आफ्नो राष्ट्र अमेरिकाका लागि उपाधि जितेका थिए । उनले देशका लागि त्यो सबै गरे, जो एक खेलाडीका तर्फबाट गर्न सकिन्छ र खेलाडीको दायित्वभित्र पर्छ । 

तर, आफ्नो करियरमा ३७ पटक विपक्षी खेलाडीलाई नाकआउट गर्ने महान् खेलाडी अलीले आफ्नै देशमा भने रंगभेदबाट हार्न पुगे । जुन गोल्ड मेडलको खुसी उनले पूरा गरेका थिएनन्, त्यसैलाई ओहियो नदीमा फालेका थिए । उनमा त्यो आक्रोश रंगभेदकै थियो । जुन अमेरिकामा अहिले पुनः सुरु भएको छ । 

त्यसपछि उनले आफ्नो नामै फेरे । उनको वास्तविक नाम क्यासियस मार्सेलस क्ले जुनियर थियो । उनी यस रंगभेदबाट यति आजित थिए कि उनले आफ्नो पहिचानै परिवर्तन गर्न पुगे । उनले नाम, धर्म र जन्मदेखि उनीसँगै भएकाहरुलाई पनि छाडिदिए । मुस्लिम धर्म अपनाएर उनले आफ्नो नाम मोहम्मद अली राखे । 

रोम ओलम्पिकमा १८ वर्षको उमेरमा उनले तहल्का मच्चाएका थिए । विपक्षी खेलाडीले उनीविरुद्ध एक अंकसमेत जोड्न सकेनन् । बक्सर अलीले हरेक फाइट ५–० को अन्तरमा जित्दै गोल्ड मेडल हासिल गरे ।

देशका लागि यत्रो ठूलो सम्मान जित्दा आफूलाई सबैले माया गर्ने, सम्मान दिने उनले सोचेका थिए । तर, उनी कालो वर्ण भएकै कारण त्यसो हुन सकेन र रिङमा नहार्ने अली वास्तविक जीवनमा भने हार्न पुगे । गोरा अमेरिकनका नजरमा अलीको रंगकै कारण ओलम्पिकको स्वर्ण पदकको सुनौलो रंग देखिएन । उनी अमेरिको एक ठूलो रेस्टुरेन्टमा जान चाहन्थे । जहाँ गोरा जातिकालाई मात्र जान अनुमति थियो ।