काठमाडौं । कोभिड १९ संक्रमण जोखिम कम गर्न सरकारले जारी गरेको लकडाउनको आज ७३ दिन पुगेको छ । गत चैत ११ देखि सरकारले लकडाउन गरेको हो । लामो समयसम्म लकडाउन हुँदा जनजीवन प्रभावित बनेको छ । अत्यावश्यकबाहेक सबै सेवा ठप्प छन् । देशभर संक्रमितको संख्यामा वृद्धि भएसँगै सरकारले पनि लकडाउनलाई कडाइ गरेको छ । सरकारले पटक–पटक गरी जेठ ३२ गतेसम्मका लागि लकडाउन घोषणा गरेको छ ।

लामो समय लकडाउनमा परेका सर्वसाधारण भने बिहान–बेलुकाको समय मिलाएर अत्यावश्यक सामग्री किन्ने गरेका छन् । यस्तै काठमाडौंमा रहेका भारतीय मजदुरहरू पनि लामो समयदेखिको लकडाउनका कारण प्रभावित बनेका छन् । उनीहरू अझै बिनाकाम काठमाडौंमा बस्नुभन्दा पनि स्वदेश (भारत) फर्किने तयारी गरेका छन् । भारतको कोलकातालगायत क्षेत्रका कालिगढहरू काठमाडौंका विभिन्न पसलमा काम गर्थे उनीहरू विशेषगरी सुनचाँदीका गरगहना बनाउने काममा काठमाडौंको न्युरोड आसपास परिवारसहित बसेका थिए । 

लामो लकडाउनका कारण आफूहरूको रोजीरोटी गुमेको भन्दै काठमाडौंको न्युरोडमा घर जानेभन्दै गाडी रिजर्भ गरेर प्रस्थान गरेका छन् । नेपालका विभिन्न पसलहरूमा सुनचाँदीका गहना बनाउनेहरू अधिकांश भारतीय बंगालीहरू हुन् । नेपालस्थित भारतीय दूतावासको सहयोगमा नेपालबाट भारत बसमै जान लागेका हुन् । आज (बिहीबार) पनि भारत जान तयारी अवस्थामा रहेका करिब १७० भारतीय थिए । हेरौं भारत जानका लागि गाडी कुरिरहेका भारतीय मजदुर तथा उनका परिवारका थप तस्बिर :