काठमाडौं । गत चैत १५ गते कोरोना सङ्क्रमण पुष्टि भएकी बागलुङकी अंशु सापकोटा डिस्चार्ज भएकी छिन् । बेल्जियमबाट कतारको दोहा हुँदै नेपाल आउँदा अंशुलाई कोरोना सङ्क्रमण भएको थियो ।

चैत १२ स्बावको नमुना परीक्षण गर्दा कोरोना संक्रमित ठहर भएपछि उनी धवलागिरि प्रादेशिक अस्पतालको आइसोलेसन वार्डमा भर्ना भएकी थिइन् । पछिल्लोपटक स्वाब जाँच गर्दा कोरोना नेगेटिभ देखिएपछि शुक्रबार राति डिस्चार्ज भएकी हुन् ।

“सुरुमा कोरोना पोजेटिभ आउँदा डर पनि लागेको थियो । के हुने हो, कसो हुने हो भन्ने आशंका थियो । अहिले कोरोनालाई पूर्णरूपमा जितेको छु । शरीरमा कोरोनाको लक्षण नदेखिँदै मलाई केही पनि हुँदैन भन्ने लागेको थियो । अहिले नेगेटिभ नतिजा आएपछि धेरै खुसी लागेको छु,” अंशुले बाह्रखरीसँगको कुराकानीमा भनिन् ।

हालसम्म कोरोनाको औषधि पत्ता नलागे पनि आत्मविश्वास नै सबैभन्दा ठूलो उपचार भएको बताइन् । “म सबै संक्रमितहरूलाई यही भन्न चाहन्छु, ‘‘कोरोना संक्रमण देखिँदैमा नआत्तिनुस् । धैर्य गर्नुस् । बलियो आत्मविश्वास बनाउनुस् । यो साधारण रोग हो भन्ने ठान्नुस् । कोरोनालाई सजिलै जित्नुहुन्छ ।”

शरीरमा कुनै लक्षण नहुँदा पनि २८ दिन अस्पतालमा एक्लै बस्‍नुपरेको बताउँदै त्यो समय निकै पट्यारलाग्दो र पीडादायी भएको बताइन् । घर गएपछि पनि १४ दिन क्वारेन्टाइनमै बस्न र परिवारको सम्पर्कबाट टाढै रहन चिकित्सकले सुझाएका छन् । कोरोनाले धेरै कुरा सिकाएको उनले अनुभूति सुनाइन् ।

अंशुले उपचारमा संलग्न सबै चिकित्सक, नर्सहरूलाई पनि धन्यवाद दिन छुटाइनन् । “म धवलागिरि अस्पतालका सबै डाक्टर, नर्सलाई धन्यवाद भन्न चाहन्छु । राम्रो केयर गर्नुभयो । कुनै कमी हुन दिनुभएन । उहाँहरूको माया, आर्शीवचनले पनि औषधिको काम गर्‍यो । घर–परिवार, आफन्तले पनि माया गरेर हौसला दिइरहनुभयो,” उनले खुसी हुँदै सुनाइन् ।

उनले कोरोना सङ्क्रमित, आशंकित कसैलाई पनि हेला नगर्न र रोगीको व्यवहार नगर्न अनुरोध गरिन् । “रोग जानीजानी कसैले बोकेर ल्याउने होइन, सार्ने पनि होइन, संक्रमण देखिएमा उसलाई केही नभन्नुहोला,” उनले अनुरोध गरिन् ।

अंशु दोहाबार कतार एअरवेजको क्युआर–६५२ मार्फत् नेपाल आएकी थिइन् । आन्तरिक उडानमार्फत् पोखरा उत्रिएकी अंशु त्यही दिन बागलुङ नगरपालिका–४ कुँडुले घर गएकी थिइन् ।

उनीसँगैको सिटमा बसेर आएकी नाताले हजुरआमा पर्ने ६५ वर्षीया वृद्धामा पनि कोरोना सङ्क्रमण देखिएको थियो । २० गते सङ्क्रण पुष्टि भएकी हजुरआमा पनि १७ औं दिनका दिन, वैशाख ६ गते डिस्चार्ज भएर घर गइसकेकी छिन् । उनी पनि धवलागिरि अस्पतालकै आइसोलेसन वार्डमा भर्ना भएकी थिइन् । मुटु र दमरोगी उनले पनि सहजै कोरोनाबाट पार पाएकी थिइन् ।

चैत ४ गते कतार एयरवेजको सोही उडानबाट नेपाल आएकी काठमाडौंकी प्रशिद्धी श्रेष्ठमा कोरोना सङ्क्रमण देखिएपछि अंशुको पनि थ्रोट स्वाब परीक्षण गरिएको थियो । प्रशिद्धी पनि वैशाख ६ गते नै डिस्चार्ज भइसकेकी छिन् । उनी टेकुको आइसोलेसन वार्डमा थिइन् ।

अंशुसँगै डिस्चार्ज हुनेको सङ्ख्या ११ पुगेको छ । नेपालमा हालसम्म ४९ जना कोरोना सङ्क्रमित फेला परेका छन् । ३८ जना विभिन्न अस्पतालको आइसोलेसन वार्डमा चिकित्सकको निगरानीमा छन् ।