काठमाडौं । काठमाडौंको पिङ्गलास्थानस्थित रामघाट प्राथमिक स्वास्थ्य केन्द्रले लकडाउनको अवस्थामा पनि तालिकाअनुसारको खोप कार्यक्रमलाई निरन्तरता दिएको छ ।

प्रत्येक बुधबारको दिन नियमित लागाउँदै आएको खोप कोरोना भाइरसको संक्रमणको रोकथामका लागि सरकारले लकडाउन गरेपछि रोकिएको थियो । तर अहिले स्वास्थ्य केन्द्रले सुरक्षाका प्रबन्ध मिलाएर नियमित खोपलाई निरन्तरता दिएको हो । 

स्वास्थ्य केन्द्रकी जनस्वास्थ्य निरीक्षक रञ्जनाकुमारी साहले लकडाउनको समय र कोरोना संक्रमणको जोखिम भएको अवस्थामा संक्रमण नहोस् भन्ने विषयलाई ध्यान दिँदै खोप कार्यक्रम सञ्चालन गरिएको बताए । 

उनले संक्रमण हुन नदिन सामाजिक दूरी कायम गरिएको र स्वास्थ्य उपकरण सामग्रीहरूको प्रयोगमा समेत सचेतना अपनाइएको बताए । आज बुधबार मात्रै ३४ बालबालिकालाई खोप दिइएको उनले बताइन् ।

राष्ट्रिय खोप तालिकाअनुसार शिशु जन्मनेबित्तिकै बीसीजी, ६ साता र १० सातामा डीपीटी, हेपटाइटिस बी–हिब, पोलियो र पीसीभी, १४ सातामा डीपीटी, हेपटाइटिस बी–हिब, पोलियो र आईपीभीको खोप लगाउनुपर्छ । यस्तै बच्चा जन्मेको ९ महिनामा पीसीभी, दादुरा रुबेला, १२ महिनामा जापानिज इन्सेफलाइटिस र १५ महिनामा दादुरा रुबेलाको खोप लगाउनुपर्ने तालिका छ । 
प्रतिकात्मक तस्बिर ।