चितवन । रगत संकलनका कार्यक्रम नभएपछि चितवनका अस्पतालहरूमा  रगतको अभाव खड्किएको छ । कोराना भाइरसको संक्रमणका कारण सरकारले भेला तथा जमघटका कार्यक्रम गर्न स्थगित गरेसंँगै जिल्लामा रगतको अभाव भएको हो । 

नेपाल रेडक्रस सोसाइटी चितवन शाखाका सभापति ज्ञानशाली न्यौपानेले भाइरसको संक्रमण हुन सक्ने भन्दै जिल्ला प्रशासनले जमघटका कार्यक्रम स्थगित गर्न आह्वान गरेसँगै मनोवैज्ञानिक असरका कारण  समस्या परेको बताए । उनका अनुसार यसअवधिमा मात्रै १० वटा भन्दा बढी रक्त संकलनका कार्यक्रम स्थगित भएका छन् ।

विद्यालय, विभिन्न निजी तथा सामाजिक संघ संस्थाहरूले नियमित गर्दै आएका रक्त संकलनका कार्यहरू रोकिँदा यसको असर जिल्लाका अस्पतालमा परेको उनले जानकारी दिए । 

क्षेत्रीय रक्तसञ्चार केन्द्र, भरतपुरका प्रमुख रमेशकान्त पौडेल रगत अभावका कारण आकस्मिक सेवा बाहेक अन्य बिरामीका लागि रगत दिन नसकिएको बताउँछन् । ‘हामीसंँग अब स्टक रगत छैन, बिरामीलाई चाहिएमा रगत सट्टापट्टा गरेर चलाएका छौं,’ उनले भने । स्थानीय सरकार र प्रशासनले रगत संकलनका लागि अवरोध नगरे पनि जिल्लाका अधिकांश कार्यक्रम परसर्दा रगत संकलन हुन नसकेको उनको भनाइ छ ।

रक्त अभावका कारण विभिन्न माध्यमबाट रक्तदाताहरूलाई रगत संकलनका लागि अपिल गरिए पनि अपेक्षित उपलब्धि नभएको पौडेलले बताए । उनका अनुसार जिल्लाका अस्पतालहरूमा दैनिक औसत १५० युनिट रगत आवश्यक पर्छ । 

जिल्लामा भरतपुर अस्पताल, दुई ठूला मेडिकल कलेज, बीपी कोइराला मेमोरियल क्यान्सर अस्पतालसंँगै यहांँ दुईदर्जनभन्दा बढी अस्पताल सञ्चालित छन् । कार्यालयले यसअघि चितवनसँगै नवलपुर, बारा, सर्लाही, रौतहट, मकवानपुर लगायतका जिल्लाबाट रगत संकलन गरेर ल्याउने गरे पनि अहिले सो कार्यसमेत प्रभावित भएको जनाएको छ ।

जिल्लामा माग हुने रगतमध्ये सबैभन्दा बढी बीपी कोइराला मेमोरियल क्यान्सर अस्पताल भरतपुरका बिरामीलाई जाने गर्छ । यसका साथै भरतपुरको सरकारी अस्पताल, दुई निजी मेडिकल कलेज र निजी अस्पतालमा पनि रगत आवश्यक पर्छ ।