देश

प्रचण्डमाथि जुत्ता प्रहार

रतनको बयान - प्रचण्डका कुरा चित्त बुझेनन् जुत्ता हान्दिएँ

आइतबार, फागुन १८, २०७६

रतनको बयान - प्रचण्डका कुरा चित्त बुझेनन् जुत्ता हान्दिएँ

काठमाडौं । सत्तारुढ नेपाल कम्युनिस्ट पुष्पकमल दाहाल प्रचण्डमाथि जुत्ता प्रहार गर्ने रतन तिरुवाले प्रचण्डले जनयुद्धका समयमा गरेका कुरा र अहिले कुरामा भिन्‍नता आएपछि जुत्ता प्रहार गरेको बयान दिएका छन्

महानगरी प्रहरी वृत सिंहदरबारमा रहेका रतनको बयान उदृत गर्दै एक प्रहरी अधिकारीले बाह्रखरीसँग भने, "जनयुद्धमा प्रचण्डले देखाएका सपना बिर्सिए । त्यतिबेला बोलेका कुराहरु अहिले पूरा गर्न सकेनन् । कार्यक्रममा प्रचण्डले आदर्शवादी कुरा गर्दा मलाई चित्त बुझेन । त्यसपछि जुत्ता हान्दिएँ ।"

जुम्ला स्थायी घर भएका २२ वर्षीय तिरुवाका बुबा मुन तिरुवा माओवादी युद्धमा तत्कालीन राज्य पक्षबाट मारिएका थिए । उनका कान्छा बुबा रबिकिरिण तिरुवा हाल नेत्रविक्रम चन्द नेतृत्वको प्रतिबन्धित नेपाल कम्युनिस्ट पार्टी 'विप्लव समूह' का जुम्ला जिल्ला इन्चार्ज रहेको खुलेको छ ।

तत्कालीन नेकपा एमालेका नेतासमेत रहेका पूर्वअर्थमन्त्री भरतमोहन अधिकारीको प्रथम स्मृति सभामा उपस्थित प्रचण्डमाथि आइतबार जुत्ता प्रहार भएको हो ।