मान्छेको जात
तिमी विज्ञानको विद्यार्थी
कारण र परिणामलाई विश्वास गर्ने
सजीव र निर्जीवको व्याख्या गर्ने
वनस्पति र प्राणीको वर्गीकरण गर्ने
के मान्छेको जस्तै वनस्पतिको जात पनि
ठूलो र सानो हुन्छ ?
कुनै बेला
कुनै सामन्तिले मान्छेलाई
जातमा वर्गीकरण गर्दै
ठूलो र सानो भनिदिँदैमा
केले नापेर प्रमाणित गर्छौ तिमी ?
कसैले भनेकै भरमा कोही ठूलो, कोही सानो हुन्छ ?
सामन्ति संस्कारले बनाएका नियमहरु लागू गर्न
तथाकथित ठूला जातका पाखण्डीहरु
निर्लज्ज उखान लगाउँछन्
‘बाहुनको बोली चोखो’
पाइतालाका धूलो पनि बिटुला भनिएकालाई
आफ्नो स्वार्थ पूरा गर्न
थुकले भिजाईभिजाई सिएको दौरा
ठाँटले लगाउन
फेरि उस्तै उखान लगाउँछन्
‘दमाईको थुक चोखो’
भन त तिमी आफैं
मान्छे ठूलो र सानो केले नाप्ने ?
० ० ०
लेक जर्जमा एक साँझ
हरियो डाँडाको काखमा
जूनसँग लुकामारी खेल्दै
शान्त सुन्दरी दुलहीजस्तै
मुस्कुराइरह्यौ
चिसो हावाले तिमीलाई घरीघरी जिस्क्याइरह्यो
तिमीले लजालु हाँसो हाँसिरह्यौ
तिमीलाई हेर्दै
मन्त्रमुग्ध पाहुनाहरु
क्रुजमा सयर गर्दै
तिम्रो सौन्दर्यमा मदहोस भइरहे
तिम्रो आतीथ्यमा
म पानीपानी भइरहेँ ।
तिम्रो स्पर्शमा
रोमाञ्चित भइरहेँ
तिम्रो मुस्कानसँग छोराको अगाध प्रेम मिसिएर
त्यो साँझ रङ्गीन बनिरह्यो
परेलीहरु भिजेका छन
खुसीले मन छचल्किरहेको छ
मलाई मेरो फेवा सम्झाइरह्यौ
मलाई मेरो रारा सम्झाइरह्यौ ।
