बलिउड तथा हलिउडका कलाकार, राजनीतिक तथा खेलक्षेत्रदेखि लिएर विश्वका चर्चित व्यक्तित्वको मैनको मूर्तिले भरिएको सिंगापुरको म्याडम तुसादमा अब दक्षिण भारतीय कलाकाको मूर्ति पनि सामेल भएको छ ।
अभिनेत्री काजोल अग्रवालको मैनको मूर्ति राखिएसँगै उनले दक्षिण भारतीय कलाकारको प्रतिनिधित्व गरेकी छन् । बुधबार उनी आफ्नो परिवारसँग मूर्तिको अनावरणका लागि सिंगापुर पुगेकी थिइन् ।
उनले यो खुसीको कुरा ट्विटरमार्फत् सेयर गरेकी थिइन्, “मलाई याद छ सानो हुँदा म्याडम तुसादमा गएर आफूले सम्मान र माया गर्ने व्यक्तित्वहरूको मूर्ति देखेर मोहित हुने गरेको । उहाँहरूको वीचमा हुन पाउँदा म निकै हर्षित छु । यो अहिलेसम्मकै उत्कृष्ट पराकाष्ठा र नयाँ दशक सुरु गर्ने राम्रो तरिका जस्तो महसुस भइरहेको छ,” उनी थप्छिन्, “त्यो घण्टौंको कडा परिश्रम र व्यक्तिगत त्याग, सबै मूल्यांकन भएको छ । सबैलाई धन्यवाद ।”
पछिल्लो समय काजोल अभिनेता जाने अब्रहामसँग बलिउड चलचित्र ‘सागा’ को छायांकनमा व्यस्त छिन् भने उनले कमल हसनको ‘इन्डियन २’ पनि साइन गरिसकेकी छन् । यसका साथै उनी हलिउड चलचित्रको पनि तयारीमा छन् ।
(द हिन्दुस्तान टाइम्स)