काठमाडौं । लैंगिक तथा अल्पसंख्यक समुदायले नागरिकता पाउनका लागि झेल्नुपरेको समस्याबारे निलहिरा समाजले गृहमन्त्रीको ध्यानाकर्षण गराएको छ । शुक्रबार उपप्रधान एवं गृहमन्त्री रवि लामिछानेलाई स्वअनुभूतिका आधारमा नागरिकता पाउने व्यवस्था गर्न माग गरेका हुन् ।

सुरक्षा निकाय (प्रहरी र सशस्त्र प्रहरी)मा लैंगिक तथा यौनिक अल्पसंख्यकले पनि सहभागिता जनाउन पाउने व्यवस्था गरिदिन आग्रह गरे ।

सो क्रममा गृहमन्त्री लामिछानेले हरेक व्यक्तिले आफ्नो अधिकार निर्वाध प्रयोग गर्न पाउनुपर्छ भन्नेमा आफू सचेत रहेको बताए । "यसमा मसहित सरकार पनि सचेत छ । जुन समाजमा लैंगिक अल्पसंख्यक समुदायको सम्मान हुँदैन त्यो समाज बस्नयोग्य हुँदैन । यो समाजमा मेरो जति अधिकार छ तपाईंहरुको पनि त्यति नै छ, त्यसैले यसमा पहल हुन्छ," गृहमन्त्री लामिछानेले भने ।  

नागरिकता कार्यविधिमा छलफल गर्ने तयारीमा रहेको बताउँदै उनले उक्त छलफलमा भाग लिइ समस्या राख्न अनुरोध गरे ।