काठमाडौं  । सत्तारुढ दल नेपाल कम्युनिस्ट पार्टी (नेकपा) मिलेनियम च्यालेन्ज कर्पोरेसन एमसीसीको विषयमा विभाजित देखिएको छ । बुधबारबाट सुरु भएको नेकपा केन्द्रीय कमिटी बैठकमा १५ समूह बनाएर छलफल जारी छ । बिहीबार समूहगत रुपमा भएको छलफलमा प्रधानमन्त्री केपी ओलीनिकटले एमसीसीको पक्षमा र पूर्वमाओवादी र माधव नेपालनिकटस्थ भने एमसीसीको विपक्षमा धारणा राखेका हुन् । बुधबार बैठक उद्घाटन गर्दै अध्यक्ष ओलीले एमसीसी पारित गर्नुपर्ने धारणा राखेका थिए । 

नेकपा स्थायी समिति सदस्य मणि थापाले बैठकमा एमसीसीबारे सरकारले प्रस्ट धारणा राख्नुपर्ने माग उठेको बताए । “ त्यसको निर्णयको अधिकार सचिवालयलाई हुने भनिएको छ । सचिवालयले बोलेको छैन  र यो प्रतिवेदनमा पनि सचिवलायले बोल्यो भनेर आएको छैन,” उनले भने, “धेरै साथीहरुको जोड सरकारले प्रस्ट धारणा राख्नुपर्छ भन्ने छ । एमसीसीको प्रश्न विकास र समृद्धिको पनि हो । तर, त्यो भन्दा राष्ट्रियता हाम्रो लागि मुख्य कुरा हो ।”केन्द्रिय समिति बैठकले के निर्णय गर्छ त्यो मुख्य हुने बताए । स्थायी समितिले सचिवालयलाई एमसीसी इण्डो प्यासिफिकको अंग हो कि होइन निर्क्योल गर्न भनेको उनले जानकारी दिए । इन्डो प्यासिफिकको अंग भए एमसीसी कार्यान्वयन नगर्ने र नभए कार्यान्वयन गर्ने बताए । त्यस्तै उनलेलिम्पियाधुरा, कालापानीलगायतका सीमा विवादको विषय पनि चर्को रुपमा उठेको बताए ।

नेकपामा माधव नेपालनिकट नेताहरु पनि एमसीसीको विपक्षमा उभिएका छन् । नेपाल निकट नेता जगन्नाथ खतिवडाले प्रधानमन्त्री एवं अध्यक्ष ओलीले एमसीसीको भावना नबुझेको आरोप लगाए । “प्रधानमन्त्रीज्यूले एमसीसीको अँध्यारो पाटो नछोइ उज्यालो पाटोको मात्रै चर्चा गर्नुभयो । उहाँले सम्झौताको शब्दमा जानुभयो, भावनामा जानुभएन । हाम्रो समूहले निष्कर्ष त निकालिसकेको छैन तर साझा धारणा यही रहेको छ,” खतिवडाले भने । 

पूर्व एमालेकै नेकपाका अर्का केन्द्रिय सदस्य लालबहादुर थापा भने एमसीसी नेपालको विकास र समृद्धि पारित गर्नुपर्ने पक्षमा छन् । बाजुराबाट निर्वाचित सांसद समेत रहेका थापा अमेरिकाले तय गरेको मापदण्ड पूरा गरेर आएको बताए । एमसीसीको विरोध गर्नेहरुले आग्ह, पुर्वाग्रह राखेको उनको आरोप छ । “ हामी एमसीसी पारित गर्नुपर्ने पक्षमा छौं । सुखी नेपाली समृद्ध नेपाल भनेका छौं । स्रोतहरुलाई रोकेर समृद्धि कसरी आउँछ ?,” उनले भने, “ एसियाली विकास बैंकको पनि अनुदान लिनुभएन नी । अरु संस्थालाई पनि सहयोग नदेऊ भन्ने सामथ्र्य राख्छन् ? विभिन्न,आग्रह,कुण्ठा र कहाँ के मिलेको छैन सरकारसँग मान्छेहरुका । त्यसको एउटा प्रतिफल हो भन्ने मैले बुझ्छु । ” उनले एमसीसीको विरोधमा रहेककाहरुलाई पनि एमसीसीका पक्षमा उभिन आग्रह गरे ।

बैठकमा समूहगत छलफलमा केन्द्रीय सदस्यहरुले फरक फरक मत राखिरहेका छन् । एमसीसीमा ३ थरी मत देखापरेका छन् । पहिलो, अहिले जस्तो छ त्यहीअनुसार एमसीसी पारित गर्नुपर्ने, दोस्रो केही परिमार्जनसहित पारित गर्नुपर्ने र तेस्रो एमसीसीको सहयोग लिनै नहुने मत बैठकमा व्यक्त भइरहेको छ । नेकपा नेता भीम रावल एमसीसीको पूर्ण विपक्षमा छन् ।

त्यस्तै बैठकमा अधिकांस केन्द्रीय समिति सदस्यहरुले पार्टीमा पूर्व एमाले र पूर्व माओवादीबीच भावनात्मक एकता चाँडै सम्पन्न गर्नुपर्नेमा पनि जोड दिएका छन् ।  सरकार र स्थानीय सरकारको कामले राम्रो सन्देश नदिएको र त्यसले भोलि अप्ठ्यारो पर्न सक्नेतर्फ पनि केन्द्रीय सदस्यहरुले चिन्ता व्यक्त गरेको  स्थायी समिति सदस्य थापाले जानकारी दिए । 

नेकपाको केन्द्रीय समिति बैठक शुक्रबार समूह छलफल सकिनेछ । शनिबार टोली नेताले बोल्ने क्रम सुरु हुनेछ ।  बैठक २२ गते सम्पन्न हुनेछ ।