काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेको बन्दी प्रत्यक्षीकरण रिटमाथिको सुनुवाइ सकिएको छ । सर्वोच्च अदालतका न्यायाधीश अब्दुल अजिज मुसलमानको इजलासमा परेको रिट पहिलो नम्बरमा परेको थियो ।

लामिछानेको तर्फबाट उनकी श्रीमती निकिता पाडेलले आइतबार बन्दी प्रत्यक्षीकरण रिट दर्ता गरेकी थिइन् ।

बुटवलको सुप्रिम सहकारी ठगी तथा संगठित अपराधमा उच्च अदालत तुलसीपुरको बुटवल इजलासको आदेशमा पूर्पक्षका लागि थुनामा रहेका लामिछाने यसअघि निवेदन लिएर सर्वोच्च गइसकेका छन् । उक्त निवेदनमा सर्वोच्चका न्यायाधीश टेकप्रसाद ढुंगानाको इजलासले कैफियत प्रतिवेदन झिकाउने आदेश गरेको छ ।

उक्त आदेशपछिको सुनवाइ नहुँदै लामिछानेको तर्फबाट बन्दी प्रत्यक्षीकरणको रिट दायर भएको हो । रिटमा लामिछानेलाई गैरन्यायिक थुनामा राखिएको भन्दै रिहा गर्न माग गरिएको छ । उनको रिटमा इजलासले आदेश भने गरिनसकेको लामिछानेका वकिल अधिवक्ता डा. नारायण कँडेलले जानकारी दिए ।