चितवन । राष्ट्रिय परिचय वितरण कार्यालयलाई प्रभावकारी बनाउन र तोकिएको समयमा लक्ष्य पूरा गर्न राष्ट्रिय परिचयपत्र तथा पञ्‍जीकरण विभागको टोली चितवन आइपुगेको छ । 

नागरिकको सेवा एवं सुरक्षालगायतका कार्यलाई चुस्त र दुरुस्त राख्‍न टोली पहिलोपटक चितवन आएको हो । विभागले आइतबार जिल्ला प्रशासन कार्यालय, जिल्लाका स्थानीय तह एवं सुरक्षाकर्मीहरुसँग यसबारे अन्तर्क्रिया एवं अभिमुखिकरण कार्यक्रम सम्पन्‍न गरेको छ । 

कार्यक्रममा कार्यपत्र प्रस्तुत गर्दै विभागका निर्देशक शिवराज जोशीले सरकारले स्मार्ट प्रविधिमा आधारित राष्ट्रिय परिचयपत्र बनाउने तयारी  सुरु गरेकाले यसलाई प्रभावकारी बनाउन सोही अनुसार चितवन आएको बताए । विभागले स्थानीयतहदेखि वडा टोलसम्म काम गर्न लागिएको उनले  बताए । उनका अनुसार पहिलो चरणमा विभागले १सय १७ जना दक्ष प्राविधिक र कर्मचारीको टोली सबै स्थानीय तहका वडा स्तरसम्म खटाउने छ । पहिलोपटक विभागले १५ वटा जिल्लालाई छनौट गरेको थियो उनले भने, त्यसमध्ये ७ जिल्लालाई पहिलो चरणमा सुरु गरिएको हो । 

यस परिचयपत्रको प्रयोगबाट एकीकृत परिचयपत्र व्यवस्थापन सूचना प्रणालीको विकास गर्ने, नागरिकका वैयक्तिक, जैविक विवरणको संकलन, भण्डारण, उपयोग गर्ने, नागरिकलाई राज्यबाट प्रवाह हुने सेवासँग आवद्ध गराउने उद्देश्य रहेको जोशीको भनाई थियो । नागरिकका सबै प्रकारका विवरण एउटै कार्डमा उल्लेख गरी विभागले तयारी गरिहेको विभागका  लेखा ईश्वरी प्रसाद ढकालले बताए । उनका अनुसार विभागले परीक्षणको लागि सिंहदरबारका कर्मचारी र पाँचथर जिल्लाका नागरिकको  समेत गरी १ लाख १७ हजार कार्ड वितरण गरिसकेको छ । 

आगामी  दुई वर्षभित्र हरेक योग्य नागरिकलाई राष्ट्रिय परिचयपत्र लिने गरी कामलाई गतिदिन लागिएको बताए । यस परिचयपत्रबाट नागरिकले आफूले पाउने हरेक सेवा , सुविधा  लिनसक्ने छन । यसको लागि हरेक  सरकारी कार्यालयमा कार्ड रिडरको व्यवस्था हुने उनले बताए । 

यसको डाटाको सुरक्षाको लागि विभाग संँग एउटा डाटा भण्डारण केन्द्र, नेपाल सरकार सँग एउटा र हेटौंडामा एउटा भण्डारण केन्द्र रहने उनले जानकारी दिए । यस परिचयपत्र पाउनको लागि १६ बर्ष पुगेको नेपाली नागरिक हुनुपर्नेछ । र, हाल नागरिकताको आधारमा सेवाग्राहीले यो सेवा पाउनेछन । 

यसको लागि विभागले हाल प्रतिघण्टा ५०० प्रति स्मार्ट कार्ड छाप्ने मेशीन सञ्चालन गर्ने प्रयोगमा ल्याएको छ भने छिट्टैनै प्रति घण्टा १ हजार प्रति घण्टा छापिने विभागले जानकारी दिएको छ । 

जिल्ला प्रशासन कार्यालय, चितवनका प्रमुख नारायण प्रसाद भट्टराइले सरकारको यो कार्यलाई सफल बनाउन सबैको दायित्व हुने  बताए । यसलाई गतिदिन  लागि १सय १७ जनाको प्राविधिक सहितको कर्मचारीको लागि ७सय जनाको आवेदन परेको र छिटैनै लिखित एवं मौखीक अन्तर्वाता लिएर कामलाई गतिदिने उनको भनाई छ । 

"चितवनमा यो परिचयपत्र लिनुपर्ने ६ लाख ७५ हजार को हाराहारीमा छन" , उनले भने, "यो टिमले नियमित काम गरे १सय २ दिनमा सकिन्छ ।" यस अघिपनि कार्यालयले नयाँ नागरिकता लिने नागरिकको हकमा सोही दिनमै राष्ट्रिय परिचयपत्र फाराम भरेर सेवा उपलब्ध गराउँदै आएको छ ।