पोखरा । चितवन राइनोजका कप्तान पारस खड्का र रोहन मुस्तफाको अर्धशतकको सहयोगमा चितवन राइनोजले पोखरा प्रिमियर लिग (पीपीएल) क्रिकेटमा लगातार दोस्रो जित निकाल्यो । बिहीबार भएको खेलमा चितवनले बुटवल ब्लास्टर्सलाई ११९ रनको फराकिलो अन्तरले पराजित गरेको हो ।

जितपछि बोल्दै कप्तान पारस खड्काले यस्तै खाले प्रदर्शन गर्दै प्रतियोगिताको उपाधि जित्ने योजना भएको बताएका छन् । उनले बिहीबार चितवनले गरेको प्रदर्शनले प्रतियोगिताको उपाधि होडमा झनै सम्भावना देखाएको बताए ।

“लगातार दोस्रो सफलता मिल्दा खुसी लागेको छ । अघिल्लो खेलभन्दा आजको खेल धेरै राम्रो बनेको छ । खेलाडीहरुले पनि दिन प्रतिदिन आफ्नो प्रदर्शनलाई झनै राम्रो बनाउँदै आइरहेका छन् । यही प्रदर्शनलाई अझै राम्रो बनाउने योजना छ,” कप्तान पारसले भने ।

चितवनका लागि बिहीबारको खेलमा कप्तान पारसले अर्धशतकीय पारी खेलेका थिए । ४० बल खेलेका पारसले ६ चौका र २ छक्काको सहयोगमा ६३ रन बनाएका थिए । पारसले ३५ बलमा ५ चौका र १ छक्काको सहयोगमा अर्धशतक पूरा गरेका थिए । पारस ११ ओभरको तेस्रो बलमा क्याच आउट भएका थिए । उनलाई अफताफ उदिन अहेमदले क्याच आउट गराए ।

“आजको खेलमा रोहन मुस्तफाले उत्कृष्ट प्रदर्शन गरे । त्यस्तै करण केसी लगायत खेलाडीहरुले उत्कृष्ट प्रदर्शन गरे । अब चितवनका लागि पछिल्ला सबै खेलहरु महत्वपूर्ण हुनेछन् । हाम्रो लागि कुनै खेलहरु पनि सहज भने छैनन् । सबै खेलाडीहरुले यही प्रदर्शनलाई उत्कृष्ट बनाउँदै गए अवश्य पनि राम्रो नतिजा हात पर्नेछ,” पारसले भने ।

बिहीबारको खेलमा चितवनले कीर्तिमानी योगफल बनाएको थियो । कूल २०३ रन बनाएको चितवनले पीपीएल प्रतियोगिताकै सर्वाधिक रन हो । 

पीपीएलको अघिल्लो सिजन सर्वाधिक १९७ रन बनेको थियो ।

चितवनले निर्धारित २० ओभरका मात्र ३ विकेट गुमाएर यो योगफल तयार पारेको हो ।

“हाम्रो टिम अघिल्लो सिजन जस्तो छैन । अहिलेको संस्करणमा नयाँ खेलाडीहरु पनि आएका छन् । हामीले विदेशी खेलाडीहरु पनि ल्याएका छौं । आजको खेलमा मात्र भन्ने हो भने बाबर हायात र रोहन मुस्तफाले उत्कृष्ट प्रदर्शन गरेका थिए । पहिले के भयो भन्दा पनि अब के गर्ने भन्ने कुरामा हामीले ध्यान दिएका छौं । प्रतियोगितामा खेलेका दुबै खेलमा सहज जित निकाल्न सकेका छौं । आगामी खेलहरुमा पनि राम्रो प्रदर्शन गर्नेछौँ रिजल्ट पनि सकरात्मक आउने छ भन्ने मेरो विश्वास हो,” पारसले भने ।

प्रतियोगिता अन्तर्गत पारको टोली चितवनले शुक्रबार धनगढी ब्लुजसँग प्रतिस्पर्धा गर्दैछ ।