काठमाडौं । नेपाली राष्ट्रिय महिला भलिबल टोलीले आज मैत्रीपूर्ण खेलमा घरेलु टोली थाइल्यान्डको सामना गर्दैछ । अभ्याससँगै मैत्रीपूर्ण खेलका लागि थाइल्यान्ड रहेको टोलीले मैत्रीपूर्ण खेलमा थाइल्यान्डको राष्ट्रिय टोलीको सामना गर्न लागेको हो । खेल नेपाली समयअनुसार अपरान्ह ४ बजेपछि सुरु हुनेछ । 

१३ औं दक्षिण एसियाली खेलकुद(साग) र सेन्ट्रल जोन भलिबल च्याम्पीयनसिपको तयारीमा रहेको नेपाल बलियो टोली थाइल्यान्डविरुद्ध आफनो कमिकमजोरी पत्ता लगाउन चाहन्छ । 

नेपालले यसअघि विभिन्न टोलीसँग भएका पाँच मैत्रीपूर्ण खेलमध्ये ३ खेलमा जित र २ मा हार ब्यहोरेको छ । सागमा स्वर्ण पदकको लक्ष्यसहित वैदेशिक भ्रमणमा रहेको नेपाल टोलीमा रहेका कमजोरीलाई सुधारसहित फर्किने योजनामा छ ।

स्वदेश फर्किएलगत्तै नेपाल बंगलादेशमा हुने एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपमा सहभागि हुनेछ । त्यसपछि घरेलु मैदानमा आयोजना हुने सागमा प्रतिस्पर्धा गर्नेछ ।