काठमाडौँ । करिब चार वर्षसम्म निलम्बनमा परेको नेपाल क्रिकेट संघ (क्यान)ले केही सयमअघि मात्र नयाँ नेतृत्व पायो । त्यसपछि अन्तराष्ट्रिय क्रिकेट परिषद् (आईसीसी) ले क्यानमाथि लगाएको निलम्बन हट्ने सम्भावना जिवित हुन थाल्यो ।

आईसीसीले सन् २०१६ मा सरकारी हस्तक्षेप र अवैधानिक चुनावको कारण देखाउँदै नेपाल क्रिकेट संघलाई निलम्बन गरेको थियो । त्यसयता भएका विभिन्न घटना क्रमलाई बुझ्ने हो भने क्यानको निलम्बन फुकुवा हुने विभिन्न अवसरहरु आए । नेतृत्वको खटपट र क्रिकेट संघभित्रको राजनीतिले कुरा मिल्न करिब चार वर्ष लाग्यो ।

आईसीसीले लगाएको निलम्बन फुकुवा हुने पहिलो खुड्किलोको रुपमा रहेको क्यानको चुनाव काठमाडौंमा गत असोज १० र ११ सम्पन्न भायो । जसमा चतुरबहादुर चन्दले नेपाली क्रिकेटलाई नेतृत्व गर्ने अवसर पाए ।

उनले निर्वाचित भएको पहिलो दिनमा नै आईसीसीले क्यानलाई लगाएको निलम्वन फुकुवा गर्ने पहिलो योजना रहेको बताएका थिए । सोही अनुसार क्यान निलम्बन फुकुवालगायतका विषयहरुमा छलफल गर्न आईसीसीको बोर्ड बैठक आज आइतबार बस्दैछ ।

दुबईमा बस्ने बोर्ड बैठकले क्यानको निलम्बन फुकुवा गर्ने सम्भावना केही मात्रामा भएको क्यानका पूर्व अध्यक्ष विनयराज पाण्डेको बताउछन् । साथै उनले आईसीसीले खटाएको स्वतन्त्र कमिटिबाट नै चुनाव भएको कारण पनि फुकुवा हुने सम्भावना रहेको उनको बुझाई छ ।

“चुनाव पारदर्शी ढंगले भएको आधारले मात्र हामीले क्यानको निलम्बन फुकुवा हुन्छ भन्न मिल्दैन् । आईसीसीले तोकेका सबै मापदण्ड अनुसार क्यान निर्वाचन र नयाँ संघ अगाडि बढेको छ भने निलम्बन फुकुवा हुन पनि सक्छ, यो सबै कुरा आईसीसीको हातमा छ,” पाण्डेले बाह्रखरीसँग भने ।

पाण्डे लामो समय क्यानको अध्यक्षको भूमिकामा थिए । उनी गत चुनावमा चतुरबहादुर चन्द नेतृत्वको टोलीसँग पराजित भएका थिए । लामो समय नेपाली क्रिकेटको अनुभव भएका उनले आईसीसीले क्यानको निलम्बन फुकुवा गर्ने र यदि आतइबार फुकुवा नभएमा क्यानलाई बाँकी आधारहरु पूरा गर्न निर्देशन दिने सम्भावना रहेको बताए ।

“आईसीसीले क्यानलाई तीन कुरामा चित्त नबुझ्दा निलम्बनमा पारेको थियो । पहिलो कुरा निर्वाचन पूर्णरुपमा भएन्, दोस्रो निर्वाचनमा पारदर्शीता भएन् र क्यानमा सरकारी हस्तक्षप भयो भन्दै निलम्बन गरेको हो । आईसीसीलाई यो सबै कुराबाट क्यान टाढा भएको टुंगो लगाएमा क्यानको फुकुवा हुन्छ । बाँकी कुरा अहिले नयाँ नेतृत्वले आईसीसीलाई कसरी समझदारीमा ल्याउछ भन्ने हो,” पाण्डेले भने ।

आईसीसीले क्यानको निलम्बन फुकुवा नगरे पनि केही निर्णयमा पुग्ने उनले बताए । आईसीसीले क्यानको निलम्बन फुकुवामा सहयोग पुर्‍याउने हेतुले सल्लाहाकार समिति गठन गरेर क्यानको नयाँ विधान तयार गरेको थियो । जस अनुसार क्यानले नयाँ नेतृत्व पाएको थियो ।