चितवन ।  चितवनमा पहिलो पटक हुन लागेको ‘प्रथम अन्तर्राष्ट्रिय आमन्त्रण चितवन भेट्रान कप २०७६’ फुटबल प्रतियोगिता सुरू हुँदैछ । असोज २ गतेबाट हुने प्रतियोगिताको सोमबार पत्रकार सम्मेल गर्दै आयोजक संस्था भेटान फुटबल क्लब चितवनले जानकारी दिएको हो । 

प्रतियोगिताको लागि आवश्यक सम्पुर्ण  तयारी  अन्तिम चरणमा पुगेको प्रतियोगिता संयोजक बरुण बस्नेतले बताए । प्रतियोगितामा सहभागी हुने सबै टिमको टुंगो लागिसकेको छ भने खेल तालिका पनि सार्वजनिक भइसकेको छ । असोज ५ गते सम्म हुने प्रतियोगितामा नेपालका १४  र २ वटा टिम विदेशका गरी कुल १६ क्लबहरुले सहभागीता जनाउने टिम संयोजक विरेन्द्र पाण्डेले जानकारी दिए । सहभागी क्लबहरुलाई २ समुहमा बिभाजन गरिएको छ । 

समुह ‘ए’ मा आयोजक चितवन भेट्रान (निलो) सहित मकवानपुर भेट्रान हेटौंडा, अभिषेक चर्च नवलपुर, रोयल भेट्रान दार्जिलिङ, बगरभाई खलक पोखरा, टि बरगर ललितपुर, नाईट किङ्ग काठमाडौं र धरान भेटेरान क्लब गरी आठवटा  रहेका छन् । यस्तै समुह ‘बी’ मा सानो गौचरन काठमाडौं, रुपन्देही भेट्रान ११ बुटवल, बीबीसी भेट्रान बनेपा, झापा भेट्रान, चितवन भेटेरान (रातो), युथ एकेडेमी बिरगञ्‍ज, देहरादुन एफसी भारत र कैलाली भेट्रान रहेका छन् । 

प्रतियोगिताको पहिलो चरणको खेलहरु दुई दिन हुनेछ । दुबै दिन चार-चारवटा खेल हुनेछन् । सहभागी १६ मध्य ८ टोली क्वाटरफाइनल प्रवेश गर्नेछन् । क्वाटरफाइनलका खेलहरु ४ गते हुनेछन् भने सेमिफाइनलको खेलहरु ५ गते र फाइनल खेल ६ गते हुने श्रेष्ठले बताए । प्रतियोगिताको पहिलो दिन आयोजक चितवन भेट्रान (निलो) र मकवानपुर भेट्रान हेटौंडा भिड्नेछन् । 

प्रतियोगिताको विजेताले नगद रु एक लाख ११ हजार एक सय ११ प्राप्त गर्ने आयोजक चितवन भेट्रान फुटबल क्लबका अध्यक्ष रविन्द्र श्रेष्ठले जानकारी दिए । उपविजेताले ५० हजार पाँच सय ५५ रुपैँया प्राप्त गर्नेछ । 

प्रत्येक दिनका म्यान अफ म्याचले एक हजार तथा उत्कृष्ट गोलरक्षक, उत्कृष्ट डिफेन्डर र सर्वा्धिक गोल कर्ताले नगद पाँच-पाँच हजार प्राप्त गर्नेछन् । यस्तै प्रतियोगिता भरको उत्कृष्ट खेलाडीले १० हजार रुपैया प्राप्त गर्ने बताइएको छ । प्रतियोगिता सम्पन्न गर्न लागि १० लाख खर्च हुने आयोजकको अनुमान छ ।