चितवन । चितवनमा डेंगु संक्रमितको संख्या दैनिक बढिरहेको छ । यसमा सुधार आउन सकेको छैन भने नियन्त्रणका प्रयास पनि पर्याप्त छैनन् । डेंगु सक्रमण नियन्त्रण गर्न वडादेखि नगरसम्म जनचेतनाका कार्यक्रमलाई सक्रिय पारे पनि यसको प्रभावकारी शून्य छ । जिल्लाका सरकारी एवं नीजी अस्पतालका शैयामा डेंगु र भाइरल ज्वरोका बिरामीले भरीभराउ छन् ।

स्वास्थ्य कार्यालय चितवनका कीट नियन्त्रक राम केसीका अनुसार साउनयता सोमबारसम्म चार हजार एक सय ४९ जनाको रगतको नमूना परीक्षण गर्दा एक हजार तीन सय ६५ जनामा डेंगु देखिएको छ । दैनिक ८० देखी ९० जनाले रगतको नमुना परीक्षण गर्ने गरेको उनले जानकारी दिए । कार्यालयको तथ्यांक अनुसार अनुसार यो संख्या हालसम्मकै उच्च हो ।  

आर्थिक वर्ष २०६७-०६८ मा तीन हजार दुई सय ९८ जनाको डेंगु परीक्षण गरिएकोमा सात सय ३९ जनामा संक्रमण देखिएको थियो । त्यस आर्थिक वर्षमा पाँच जनाको मृत्यु भएको कार्यालयले जनाएको छ । आर्थिक वर्ष २०७०-०७१ मा ३७१ जनामा डेंगुको संक्रमण देखिएको थियो । दुई हजार दुई सय ६१ जनाको परीक्षण गरिएकोमा सो संख्यामा डेंगु देखिएको हो ।

यस्तै आर्थिक वर्ष २०७३-०७४ मा दुई हजार पाँच सय ६२ जनामा परीक्षण गर्दा छ सय ८७ जनामा डेंगु फेला परेको थियो । उक्त आर्थिक वर्षमा एक जनाको मृत्यु भएको थियो । त्यसैगरी जिल्लामा आर्थिक वर्ष २०७१-०७२ मा एक सय १९, ०७२-०७३ मा ८५, ०६८-०६९ मा ६८, ०७४-०७५ मा ५९ जनामा डेंगु संक्रमण देखिएको थियो । 

आर्थिक वर्ष २०६९-०७० मा ५२ जनामा डेंगु देखिएको थियो भने गत आर्थिक वर्षमा एक हजार नौ सय ५१ जनाको डेंगु परीक्षणमा ३१ जनामा देखिएको थियो । यस तथ्यांकलाई हेर्दा हरेक तीन-तीन वर्षमा संक्रमण बढेको देखिन्छ । जिल्लाका अन्य स्थानभन्दा भरतपुर महानगरपालिका भित्र डेंगु संक्रमितको संख्या उच्च रहेको उनले बताए । 

भरतपुरको वडा नम्बर १, २ र ३ मा डेंगु संक्रमितको संख्या उच्च रहेको केसीले जानकारी दिए । साउनयता मात्रै डेंगु र स्क्रबटाइफसबाट चितवनमा चार जनाको ज्यान गइसकेको छ ।