काठमाडौं । वैदेशिक रोजगारीका क्रममा भएका ठगी र बदमासीसँग सम्बन्धित ३७४ मुद्दा फछ्र्योट भएको छ । वैदेशिक रोजगार न्यायाधीकरणले अघिल्लो आर्थिक वर्ष ०७५–०७६ मा सो परिमाणमा मुद्दा फछ्र्योट गरेको हो ।

अघिल्लो आर्थिक वर्षमा भन्दा यो फछ्र्योट दर बढी हो । वैदेशिक रोजगार न्यायाधीकरणले आर्थिक वर्ष ०७४–०७५ मा ३ सय २५ थान मुद्दाको फैसला गरेको थियो ।

योसँगै अब २ सय ३ थान मुद्दा वैदेशिक रोजगार न्यायाधीकरणमा विचाराधीन छन् । आर्थिक वर्ष ०७५÷०७६ मा मात्र न्यायाधिकरणमा २ सय ५९ थान मुद्दा दर्ता भएका थिए । अघिल्लो वर्षहरुबाट जिम्मेवारी सरेर आएका ३ सय १८ थान गरी कूल ५ सय ७७ थान मुद्दा थिए । जसमध्ये अब वैदेशिक रोजगार न्यायाधीकरणमा २ सय ३ थान मुद्दा बाँकी छन् ।

न्यायाधीकरणका सूचना अधिकारी हेमराज शर्माका अनुसार न्यायाधिकरणमा २ वर्षभन्दा पुराना मुद्दा धेरै फछ्र्योट भइसकेको छ । ६ थान मुद्दामात्र २ वर्ष पुराना बाँकी छन् । पछिल्लो ६ महिनामा मात्र १ सय ४१ थान मुद्दा दर्ता भएका थिए । न्यायाधिकरणमा ७० थान थुनुवा मुद्दा छन् । वैदेशिक रोजगारीमा लैजाने भन्दै विभिन्न माध्यमबाट ठगिएपछि पीडितहरु न्यायाधीकरण पुग्ने गर्छन् । न्यायाधीकरणले वैदेशिक रोजगारीसँग सम्बन्धित मुद्दा मात्र हेर्ने गर्छ । अहिले न्यायाधीश सत्यराज आचार्य अध्यक्ष, रमादेवी पराजुली र रामेश्वर रेग्मी सदस्य रहेको न्यायाधीकरण छ ।

साढे ५३ करोड बढी ठगीको उजुरी
वैदेशिक रोजगारीका क्रममा हुने ठगीको चाङ वैदेशिक रोजगार विभागमा पनि उस्तै छ ।  विभागमा असार मसान्तसम्ममा ७ सय ७६ थान उजुरी परेका छन् । असार महिनामा मात्र ५५ उजुरी परेका छन् । वैदेशिक रोजगारीमा पठाउँछु भन्दै ठगी भएको भन्दै हाल विभागमा ७ सय ७६ थान उजुरी छन् । यसरी परेका उजुरीमा ५३ करोड ६७ लाख २८ हजार ६ सय ८४ रुपैयाँको माग दाबी गरिएको विभागले जनाएको छ ।

असार महिनामा परेको ५५ थान उजुरीमा मात्र ४ करोड ३८ लाख ८८ हजार ५० रुपैयाँ ठगी भएको भन्दै उजुरी परेको थियो । विभागले दायर गरेका १ सय ८६ थान मुद्दा अदालतमा विचाराधीन छन् । सो मुद्दामा विगो, हर्जना बापत २२ करोड ५६ लाख ९३ हजार ३ सय ७१ रुपैयाँ माग दाबी गरिएको विभागको उजुरी तथा अनुसन्धान शाखाले जनाएको छ ।