काठमाडौँ । नेपाल कम्युनिस्ट पार्टी (नेकपा)को संगठन विभागमा वामदेव गौतमको सम्भावना बढेको छ । अध्यक्ष पुष्पकमल दाहाल र वरिष्ठ नेता माधव नेपाललेसमेत सहमति जनाएपछि वामदेवको सम्भावना बढेर गएको हो । स्रोतका अनुसार नेता नेपालले वामदेवलाई नै प्रस्ताव गरेका छन् । नेकपाको नौ सदस्यीय सचिवालयमा संगठन विभागमा चार आकांक्षी छन् । वामदेव गौतमका अतिरिक्त महासचिव विष्णु पौडेल, सचिवालय सदस्य तथा रक्षामन्त्री ईश्वर पोखरेल र गृहमन्त्री रामबहादुर थापा बादलले संगठन विभागमै आँखा लगाएका छन् ।

अध्यक्ष ओली बादललाई संगठन विभाग प्रमुख बनाउने पक्षमा छन् । पोखरेल र पौडेलका पक्षमा नेताहरू खुलेका छैनन् । तर, वामदेवलाई अर्का अध्यक्ष प्रचण्ड र नेता नेपालले ‘ग्रिन सिग्नल’ दिएको स्रोतको दाबी छ । यद्यपि मंगलबार बस्ने सचिवालयको बैठकले विभागको टुंगो लगाउने बताइएको छ । यसअघि सोमबारै कार्यविभाजन टुंग्याउने भनिए पनि नेताहरूबीच सहमति नजुटेपछि अन्तिम समयमा स्थगित भएको थियो ।

वामदेव पार्टी एकतायता महत्त्वपूर्ण भूमिकामा छैनन् । चुनाव हारेकाले चारवर्ष राजकीय जिम्मेवारी पनि पाउने छैनन् । पार्टीमा कुनै भूमिका नदिइएको भन्दै उनले नेतृत्वविरुद्ध असन्तुष्टि पनि प्रकट गर्दै आएका छन् । संगठन विभाग दिएर असन्तुष्टि व्यवस्थापन पर्ने पक्षमा छन्, नेपाल ।

‘प्रतिष्ठाको विषय बनाइयो’

साविक एमालेको संगठन विभाग प्रमुख पृथ्वीसुब्बा गुरुङ थिए । माओवादी केन्द्रको संगठन विभागको कमाण्ड बादलले सम्हाल्दै आएका थिए । तर एकीकृत पार्टीलाई संगठन विभाग टुंग्याउन हम्मेहम्मे परेको छ । पार्टी अध्यक्षद्वय ओली–प्रचण्ड र सचिवालयका नेताहरू पटकपटक छलफलमा बसे पनि टुंगिन नसकेको नेताहरू बताउँछन् ।

“संगठन विभाग प्रमुख त्यस्तो महत्त्वपूर्ण पद होइन । तर, प्रतिष्ठाको विषय बनाइएकाले टुंग्याउन गाह्रो भयो,” नेकपाका एक नेता बताउँछन् । गृहमन्त्री र रक्षामन्त्रीजस्तो महत्त्वपूर्ण जिम्मेवारीमा रहेका रामबहादुर थापा बादल र ईश्वर पोखरेलले समेत दाबी गरेपछि सकस परेको हो ।

एमालेमा को–को भए संगठन विभाग प्रमुख ?

२०४९ सालको पाँचौँ महाधिवेशनले पार्टी महासचिवमा मदन भण्डारी चयन गर्‍यो । ततपश्चात संगठन विभाग प्रमुख जीवराज आश्रित चुनिएका थिए । तर, २०५० सालमा मदन, आश्रित दुवै रहस्मय दुर्घटनामा परेपछि माधव नेपाल महासचिव भए, र संगठन विभाग प्रमुख वामदेव गौतम चुनिए । ०५१ सालमा पार्टी सरकारमा गएपछि कार्यवाहक महासचिवको जिम्मेवारी गौतमको काँधमा आयो । र, संगठन विभाग प्रमुख चुनिए– विष्णु पौडेल ।

२०५४ सालको पार्टी विभाजन पछि अमृत बोहोरा संगठन विभाग प्रमुख चुनिए । ०५९ सालको सातौँ महाधिवेशनपछि ईश्वर पोखरेल पार्टी संगठन विभाग प्रमुख चुनिएका थिए । ०६१ असारमा एमाले देउवा नेतृत्वको सरकारका सहभागी भएपछि संगठन विभागको जिम्मेवारी पुनः पौडेलको काँधमा आयो । २०६५ फागुनमा सम्पन्न बुटवल महाधिवेशनपछि युवराज ज्ञवाली संगठन विभाग प्रमुख भए ।

२०७१ साउनमा सकिएको नवौँ महाधिवेशनपछि भने पृथ्वीसुब्बा गुरुङ संगठन विभाग प्रमुख थिए । कमिटी र पार्टी सदस्यहरूको लगत राख्ने र आधारतभूत तहका पार्टी कमिटीसँग सीधा सम्बन्ध काय हुने हुनाले कम्युनिस्ट पार्टीमा संगठन विभागको विशेष महत्त्व रहन्छ ।