काठमाडौं । देशको एकमात्र अन्तर्राष्ट्रिय विमानस्थल त्रिभुवन अन्नतर्राष्ट्रिय विमानस्थल (टीआईए)बाट सात महिनाको अवधिमा पहिचान नखुलेका (अपरिचित) ३६ हजारभन्दा बढी यात्रुहरु ओहोरदोहोर गरेको पाइएको छ । उनीहरु कुन देशबाट आएका वा कुन देश गएका हुन् भन्ने जानकारी भएपनि उनीहरु पुरुष, महिला वा तेस्रोलिंगी के हुन् भन्ने खुल्दैन । 

“यात्रुले अध्यागमन फारम भर्दा ‘सेक्स’ महल खाली राखिदिँदा पहिचान खुल्न नसकेको हुनसक्छ । तेस्रोलिङ्गी यात्रुले पनि खाली छोडेका हुनसक्छन्,” अध्यागमन विभागका निर्देशक तथा सूचना अधिकारी विष्णुहरी उपाध्यायले बाह्रखरीसँग भने, “प्राविधिक कारण र हेलचक्राईंले पनि यस्तो त्रुटी हुनसक्छ ।” 

अध्यागमन विभागको तथ्याङ्कअनुसार सन् २०१८ को जनवरी, फेव्रुअरी, मार्च, अप्रिल, मे, जुलाई र नोभेम्बर गरी ७ महिनामा स्वदेशी तथा विदेशी गरी करिब २७ लाख यात्रु नेपाल भित्रने र बाहिरिने गरेका छन् । यीमध्ये ३६ हजार ७२ यात्रुको पहिचान खुल्दैन । अध्यागमनले नै उनीहरुलाई ‘अपरिचित’ यात्रुको सूचीमा राखेको छ । अध्यागमनको अपरिचित यात्रुको सूचीमा रहेका सबै नेपाली र भारतीय नागरिक हुन् । अन्य देशका नागरिक यो सूचीमा परेका छैनन् । 

सात महिनामा स्वदेशी तथा विदेशी गरी कूल १३ लाख ५३ हजार ७ सय ६० यात्रु नेपाल भित्रिएका थिए भने सोही अवधिमा १४ लाख ३२ हजार २ सय १७ यात्रु नेपालबाट बाहिरिएको देखिन्छ । नेपाल आउने यात्रुमा ७ लाख २१ हजार १ सय ४४ जना नेपाली र ६ लाख ३२ हजार ६ सय १६ जना विदेशी थिए । यस्तै, नेपालबाट बाहिरिने मध्ये ७ लाख ६५ हजार २ सय १७ जना नेपाली र ६ लाख ६७ हजार विदेशी नागरिक थिए । 

सन् २०१८ को सात महिनाको अवधिमा टीआईएबाट नेपाल भित्रिने २० हजार १ सय ७६ यात्रुको पहिचान खुल्दैन भने बाहिरिनेमध्ये १५ हजार ८ सय ९६ जनालाई अपरिचित यात्रुको सूचीमा राखिएको छ । “सूचना राख्नेले राम्रोसँग सूचना नराखिदिँदा अपरिचित यात्रुको संख्या ठूलो देखिएको हुनसक्छ,” उपाध्यायले भने । 

अध्यागमनको तथ्याङ्कअनुसार नेपाल भित्रिएका अपरिचित यात्रुमध्ये १२ हजार ४२ नेपाली थिए भने ८ हजार १ सय ३४ जना विदेशी । यस्तै, नेपालबाट बाहिरिने अपरिचित यात्रुमा ८ हजार १ सय ४३ जना नेपाली र ७ हजार ७ सय ५३ जना विदेशी थिए । 

सन् २०१८ को जनावरीमा नेपाल भित्रिनेमध्ये ७ सय ४९ र बाहिरिने मध्ये ७ सय ९८ जना विदेशीलाई पहिचान नखुलेको यात्रुको सूचीमा राखिएको छ । पहिचान नखुलेको सूचीमा राखिएका सबै यात्रु भारतीय हुन् । जनावरीमा नेपाल आउनेमध्ये १ हजार ७ सय ६१ र बाहिरिनेमध्ये १ हजार ९९ नेपालीलाई विभागले उक्त सूचीमा राखेको देखिन्छ । फेव्रुअरीमा पहिचान नखुलेको १ हजार १६ जना नेपाल भित्रिएको र २ हजार २८ जना विदेशी बाहिरिएका थिए । सोही महिना पहिचान नखुलेका २ हजार ९० जना नेपाली स्वदेश फर्केको र २ हजार २४ जना नेपाली बाहिरिएको देखिन्छ । 

सन् २०१८ को मार्चमा पहिचान नखुलेका ८ सय २८ जना विदेशी (भारतीय) नेपाल प्रवेश गरेको देखिन्छ भने ७ सय १९ जना बाहिरिएको । यस्तै, सोही महिना पहिचान नखुलेका १ हजार ४ सय ८९ नेपाली यात्रु स्वदेश फर्केको र ९ सय ७६ यात्रु बाहिरिएका थिए । अप्रिलमा पहिचान नखुलेका १ हजार १ सय १ विदेशी यात्रु नेपाल प्रवेश गरेका थिए । सोही महिना पहिचान नखुलेका एक हजार ७५ विदेशी यात्रु नेपालबाट बाहिरिएको देखिन्छ । अप्रिलमा पहिचान नखुलेका ६ सय ४९ जना नेपाली स्वदेश फर्केको र १ हजार ६ सय ६४ जना बाहिरिएको तथ्याङ्कले देखाउँछ । 

सन् २०१८ को मे महिनामा नेपाल आएका मध्ये १ हजार ६ सय ७७ यात्रुको पहिचान खुल्न सकेको थिएन भने नेपाल छोडेकामध्ये १ हजार ४३ जनाको । मेमै विदेशबाट नेपाल प्रवेश गर्ने १ हजार ३ सय ३१ जना र नेपाल छोड्ने ८ सय ६७ नेपालीलाई अपरिचित यात्रुको सूचीमा राखिएको थियो । जुलाई महिनामा नेपाल भित्रिएका मध्ये १ हजार ४ सय २० जना र नेपाल छोड्ने मध्ये १ हजार ३ सय ७१ जना विदेशी यात्रुको पहिचान खुलेको थिएन । सोही महिना टीआईएबाट आउने २ हजार ३ सय ११ जना र देश छोड्ने १ हजार ३ सय ३९ जना नेपाली यात्रुको पहिचान खुलेको थिएन । 

गत वर्षको नोभेम्बरमा नेपाल आउने मध्ये १ हजार ३ सय ९६ जना विदेशी पर्यटकको पहिचान खुल्न सकेको थिएन । सोही महिना नेपाल छोड्ने मध्ये १ हजार १ सय ४५ जना विदेशीलाई पहिचान नखुेको यात्रुको सूचीमा राखिएको थियो । नोभेम्बरमा स्वदेश फर्केका मध्ये १ हजार ३ सय ९६ जना र विदेशिनेमध्ये १ हजार १ सय ८७ जना नेपालीको पहिचान खुल्न सकेको छैन ।