काठमाडौं । इराकको प्राचीन सहर निमरुदलाई आतंककारी संगठन इस्लामिक स्टेट (आईएस) को कब्जाबाट मुक्त गरेको इराकी सेनाले दाबी गरेको बीबीसीले जनाएको छ ।

निमरुद सहरलाई इस्लामिक स्टेटले दुई वर्षअगाडि आफ्नो कब्जामा लिएको थियो । 

सन् २०१५ को मार्चमा सहरमा आईएसले विध्वंस गरेको तस्बिरहरू  सार्वजनिक भएको थियो ।

इतिहासकार तथा पुरातत्वविदहरुले उक्त सहरका प्राचीन धरोहरहरु नष्ट भएको घटनामाथि चिन्ता व्यक्त गरेका थिए ।

उक्त सहरमा इसापूर्व १३ सयमा बनेका धेरै ऐतिहासिक धरोहरहरु रहेका बताइएको छ ।

संयुक्त राष्ट्रसंघको संस्कृति संस्था युनेस्कोले  प्राचिन धरोहरहरु नष्ट गर्ने कामलाई युद्ध अपराधको संज्ञा दिएको थियो ।

निमरुद, आईएसको कब्जामा रहेको मोसुल सहर बाट करिब ३० किलोमीटर टाढा पर्छ ।

इराकी सेनाले हालैका दिनमा मोसुललाई इस्लामिक स्टेटको कब्जाबाट छुटाउनका लागि प्रयास गरिरहेको छ ।

सरकारले जारी गरेको एक विज्ञप्तिका अनुसार सेनाको नवौं टुकडीले निमरुद माथि पूर्ण रूपमा नियन्त्रण गरेको र सहरका प्राचीन धरोहरमाथि इराकको झण्डा फहराएको बताइएको छ । इस्लामिक स्टेटले त्यहाँका प्राचिन धरोहरमाथि ठूलो नोक्सान गराएको उक्त विज्ञप्तिमा बताइएको छ ।