काठमाडौं । जर्मनीको बर्लिनमा एक ‘प्यालिएटिभ’ केयर डाक्टरलाई आफ्ना १५ बिरामीलाई प्राणघातक औषधिको मिश्रण दिएर हत्या गरेको आरोप लगाइएको छ ।

४० वर्षीय ती डाक्टरले २०२१ सेप्टेम्बरदेखि २०२४ जुलाईसम्म १२ महिला र तीन पुरुषलाई मारेको आरोप लागेको बीबीसीले उल्लेख गरेको छ । जर्मनीको गोपनीयता कानुनअनुसार उनको नाम भने गोप्य राखिएको बताइएको छ ।

जर्मनीको बर्लिनमा बस्ने ती डाक्टरले आफ्ना बिरामीहरूको हत्या गरेर पछि केही पीडितहरूको घरमा आगजनी समेत गरेर प्रमाण नष्ट गर्ने प्रयास गरेको बताइएको छ ।

डाक्टरले बिरामीहरूलाई जानकारीबिनै बेहोस बनाउने (एनेस्थेटिक) र शरीरको मासुलाई आराम दिने (मसल रिल्याक्सेन्ट) मिश्रण दिएर हत्या गरेकाे आरोप छ । अधिकारीहरूका अनुसार उक्त औषधिहरूले श्वासप्रश्वास निष्क्रिय बनाएर केही मिनेटभित्र मारेका थिए ।

ती डाक्टरले जर्मनीका विभिन्न राज्यहरूमा काम गरेको र संदिग्ध अवस्थामा मरेकाहरूको उमेर २५ देखि ९४ वर्षसम्म रहेको छ ।

उक्त डाक्टरले पाँचवटा अलग–अलग घटनामा पीडितहरूको अपार्टमेन्टमा आगजनी गरेका थिए । सन् २०२४ जुलाईमा एकैदिनमा उसले ७५ वर्षीय एक पुरुषलाई बर्लिनमा र केही घण्टापछि ७६ वर्षीय एक महिलालाई बर्लिनबाट नजिकैको स्थानमा हत्या गरेकाे आरोप लगाइएको छ ।

तर, ती डाक्टरले हालसम्म आरोप स्वीकार गरेका छैनन् । साथै, हत्या भएका मानिसको संख्या अझ बढ्न सक्ने सम्भावना रहेको बताइएको छ ।