काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले पदभार सम्हाल्ने बित्तिकै सन् २०१५ मा भएकोे पेरिस सम्झौताबाट पछि हट्ने छोटो उपाय खोजिरहेको स्रोतहरूलाई उद्धृत गर्दै समाचार संस्था रोयटर्सले जनाएको छ ।

आउँदो जनवरी २० मा ट्रम्पले पदभार सम्हाल्दैछन् । हालको प्रावधानअनुसार पेरिस सम्झौताबाट बाहिर आउन अमेरिकालाई करिब चार वर्ष लाग्नेछ, किनभने सन् १९९२ मा भएको रियो सन्धिसँग पेरिस सम्झौता बाँधिएको छ । 

बताइएअनुसार ट्रम्पका रणनीतिकारहरुले रियो सम्झौतालाई अस्वीकार गरेर पेरिस सम्झौतालाई रद्द गराउन खोजिरहेका छन् । 

यो सूचना त्यतिबेला सावर्जनिक भएको छ, जतिबेला मोरक्कोको माराकेश सहरमा विश्वका २०० देशका प्रतिनिधिहरुले पेरिस सम्झौताको कार्यान्वयनका बारेमा छलफल गरिरहेका छन् । 

डोनाल्ड ट्रम्पले जलवायु परिवर्तनको विषयलाई काल्पनिक बताउँदै आएका छन् । 

धेरै देशहरुले अमेरिका यस सम्झौताबाट नबाहिरिने अपेक्षा गरेका छन् । पेरिस सम्झौताको पक्षमा झण्डै २०० देशहरुले गत वर्षको डिसेम्बरमा सम्झौतामा हस्ताक्षर गरेका थिए । गत शनिबारसम्ममा विश्वका १०९ देशहरुले  यस सम्झौतालाई अनुमोदन गरिसकेका छन् ।