काठमाडौं । मुलुकका विभिन्न स्थानमा भएका छुट्टाछुट्टै दुर्घटनामा चार जनाको मृत्यु भएको छ । सप्तरीको सुरुङ्गा नगरपालिका–५ कुशाहास्थित ना ख ४६८० नम्बरको ट्रकले ना९प ८९८ नम्बरको मोटरसाइकललाई सोमबार ठक्कर दिँदा मोटरसाइकल चालकको ज्यान गएको छ । ज्यान गुमाउनेमा सिराहा लहान नगरपालिका ८ बस्ने ५० वर्षीय रामशरण चौधरी रहेको प्रहरीले जनाएको छ ।
यस्तै रौतहटको गुजरा नगरपालिका – ३ पशुपती टोलस्थित ना६त ५८४२ नम्बरको ट्याक्टरबाट अचानक खस्दा ३२ वर्षीय जगत चौधरीको टयाक्टरको चक्काले किच्दा मृत्यु भएको छ । सोलुखुम्बु दूधकुण्ड नगरपालिका ३ बोल्दोस्थित लु२ त ६४९२ नम्बरको ट्याक्टर सोमबार दुर्घटना हुँदा ट्याक्टरमा काम गर्ने सोही ठाउँ बस्ने २२ वर्षीय जीवन तामाङको मृत्यु भएको छ । यस्तै नवलपरासी (सुस्ता पूर्व) गैंडाकोट नगरपालिका १० लाङ्घाली चोकस्थित राजमार्गमा मंगलबार नम्बर खुल्न नसकेको सवारी साधनले पहिचान नखुलेको एक ३५ वर्षीय पुरुषको ज्यान गएको प्रहरीले जनाएको छ ।