खेल

एनएसजेएफ पल्सर स्पोर्ट्स अवार्डमा क्रिकेटको वर्चस्व

एनएसजेएफ पल्सर स्पोर्ट्स अवार्डमा क्रिकेटको वर्चस्व

काठमाडौं । नेपाली खेलकुदलाई २०७४ सालमा योगदान पुर्याएका विभिन्न खेलाडी तथा प्रशिक्षकलाई एनएसजेएफ पल्सर स्पोर्ट्स अवार्डबाट सम्मान गरिएको छ । एनएसजेएफ पल्सर स्पोर्ट्स अवार्डको ८ विधा मध्ये ४ विधामा क्रिकेटले अवार्ड जितेको छ । 

वर्ष उत्कृष्ट पुरुष खेलाडीको अवार्ड नेपाली राष्ट्रिय टिमका कप्तान पारस खड्काले जितेका छन् । विजेता पारसले क्रिकेटकै सन्दीप लामिछाने, गल्फका टंकबहादुर कार्की, जुडोका इन्द्रबहादुर श्रेष्ठ र ब्याडमिन्टनका दिपेश धामीलाई पछि पार्दै वर्ष उत्कृष्ट पुरुष खेलाडीको अवार्ड जितेका हुन् ।

त्यस्तै, वर्ष उत्कृष्ट महिला खेलाडीको अवार्ड ब्याडमिन्टनकी शोभा गौचनले जितिन् । विजेता बनेकी शोभाले बक्सिङकी बिमला श्रेष्ठ, फुटबलकी साबित्रा भण्डारी, आर्चरीकी ज्ञानु अवाले र टेबलटेनिसकी नबिता श्रेष्ठलाई उछिन्दै वर्ष उत्कृष्ट महिला अवार्ड चुमिन् । 

नेपाल खेलकुद पत्रकार मञ्चले विभिन्न ८ विधामा वितरण गरेको अवार्डअन्तर्गत पिपुल्स च्वाइस अवार्ड भने टेबल टेनिसका स्यान्टु श्रेष्ठले जिते । भोटिङको आधारमा क्रिकेटका सन्दीप लामिछाने, भलिबलका मानबहादुर श्रेष्ठ, फुटबलका किरण चेम्जोङ र गल्फकी प्रतिमा शेर्पालाई पछि पार्दै स्यान्टुले पिपुल्स च्वाइस अवार्ड जितेका हुन् ।

वर्षका उत्कृष्ट प्रशिक्षकको अवार्ड भने नेपाली क्रिकेट टिमका मुख्य प्रशिक्षक जगत टमाटाले जिते । उनले क्रिकेटकै विनोद दास, फुटबलका छिरिङ लोप्साङ गुरुङ, ब्याडमिन्टनका जयन्तकुमार श्रेष्ठ र बक्सिङका प्रकाश थापामगरलाई पछि पार्दै अवार्ड जितेका हुन् ।   

अवार्ड विजेता पारस खड्का, शोभा गौचन, स्यान्टु श्रेष्ठ र जगत टमाटाले पल्सर मोटरसाइकल प्राप्त गरेका छन् ।

त्यस्तै, वर्ष उत्कृष्ट युवा खेलाडीको अवार्ड भने चर्चित क्रिकेट खेलाडी सन्दीप लामिछानेले जिते । उनले क्रिकेटकै दीपेन्द्रसिंह ऐरी, फुटबलका दिनेश हेन्जन, जुडोकी मनिता श्रेष्ठ प्रधान र बक्सिङकी पुनम रावललाई पछि पार्दै वर्ष उत्कृष्ट अवार्ड जितेका हुन् ।

लाइफटाइम एचिभमेन्ट अवार्ड भने पूर्व फुटबल खेलाडी अशोक केसीलाई प्रदान गरिएको छ । नेपाली फुटबलमा अतुलनीय योगदान पुर्याएको भन्दै उनलाई सम्मान गरिएको हो । त्यस्तै, स्पेशल अवार्ड करण केसीले प्राप्त गरे । नामिवियामा सम्पन्न आईसीसी वल्र्ड क्रिकेट लिग डिभिजन टु मा क्यानाडाविरुद्ध अविजित ४२ रन बनाएर नेपाललाई विश्वकप छनोटमा पुर्याएकाले उनलाई यो अवार्ड दिइएको हो । त्यस्तै, पारा एथलिट अवार्ड बास्केटबल तथा क्रिकेट खेलाडी हिमाल अर्यालले पाए ।


 

तपाईंको मत