एजेन्सी । इजरायली लडाकू विमानले सिरियास्थित दर्जनौँ ईरानी सैन्य क्षेत्रलाई लक्षित गर्दै हवाइ हमला गरेको छ । यसअघि गोलन हाइटमा इरानले इजारयली सेना क्षेत्रमाथि २० रकेट हमला गरेपछि त्यसैको प्रतिउत्तरमा इजरालले पनि प्रहार गरेको न्युयोर्क टाइम्सले बताएको छ ।

ईरानको हमलाबाट सो क्षेत्रमा उपस्थित इजरायलको सैन्य क्षमतामा गम्भीर क्षति पुगेको इजरायलको आरोप छ । दुईदेशबीच यस प्रकारको तनावले मध्यपूर्वी क्षेत्रमा युद्ध समेत निम्तिन सक्ने खतरा रहेको बताइएको छ । वास्तवमा अमेरिकी राष्ट्रपति ट्रम्पले ईरान सम्झौता रद्द गराएर ईरानमाथि पुनः आर्थिक प्रतिबन्ध लगाउने घोषणा गरेपछि नै ईरान र इजरायलबीच लडाईँ सुरु भएको थियो । ट्रम्पको सो निर्णयले आक्रामक बनेको ईरानले अमेरिकालाई यसअघि नै धेरैपटक सम्झौता जारी राख्न चेतावनी दिएको थियो । युरोप लगायत अन्तराष्ट्रिय समुदायले पनि मध्यपूर्वको स्थितिलाई मध्य नजर राख्दै ट्रम्पसमक्ष सम्झौता रद्द नगर्न बारम्बार आग्रह गरेका थिए । तरपनि ट्रम्पले अन्तिम समयसम्म आफ्नो अडान नछाडेपछि अहिले दुवै पक्षबीचको विवाद गम्भीर अवस्थामा पुगेको बताइएको हो । 

ट्रम्पको निर्णय लगत्तै ईरानले राति नै इजरायलद्वारा नियन्त्रित गोलान हाइट क्षेत्रमा २० वटा रकेट प्रहार गरेको थियो । तर सिरियाली क्षेत्रमा भित्रिनासाथै रकेटहरु बीचमै फुटाइएकाले सैन्य क्षेत्र पूर्ण रुपमा ध्वस्त नभएको इजरायली सेनाका प्रवक्ताले बताएका हुन् । यसको केही घण्टापछि बिहिबार बिहानै इजारयलले पनि हमलाको प्रतिउत्तर दिँदै सिरियास्थित ईरानका करिब सबै सैन्य क्षेत्र ध्वस्त पारिदिने गरि आक्रमण गरेको इजारायलका रक्षा मन्त्री एभीग्डर लेबर्मनले बताएका हुन् । उनले भने, ‘हाम्रो तर्फ पानी परे, उनीहरुकहाँ पनि बाढी आउनेछ ।’ सिरियाली मानवअधिकारवादी कार्यकर्ताका अनुसार यस हमलामा २३ जनाले ज्यान गुमाइसकेका छन् । त्यसैगरी उता ईरान हमलाको प्रतिक्रियामा सिरियाली आर्मीले समेत ईरानमाथि ६८ मिसाइल प्रहार गरिसकेको समाचार एजेन्सी फार्सले उल्लेख गरेको छ । 

घटनाप्रति चिन्ता व्यक्त गर्दै अन्तराष्ट्रिय समुदायमा बेलायत, फ्रान्स, जर्मनी र रुसले शान्तिको अपील गरिसकेका छन् । ईरान र इजरायल दुवैसँग राम्रो सम्बन्ध रहेको रुसले पनि सबै पक्षलाई हमला अन्त्य गर्न आग्रह गरिसकेको बताएको छ । सिरियाली संकटको फाइदा उठाउँदै ईरानले लामो समयदेखि सिरियामा आफ्नो हतियार कार्यक्रम र सैन्य विकास जारी राख्दै आएको बताइन्छ । वास्तवमा इरानसँग यसै विषयमा असन्तुष्ट रहेकाले ट्रम्पले ईरान आणविक सम्झौताबाट अमेरिकालाई बाहिर निकालेका हुन् ।