विराटनगर । भागवत वाचक आचार्य श्रीनिवास पक्राउ परेका छन् । आचार्यले आफैंले आफैँलाई गोली हान्न लगाएको खुलासा भएकोछ ।  चैत २५ गते राति विराटनगरमा उनकै अंगरक्षक माधव चौधरीले उनलाई गोली हानेका थिए ।
आचार्य आफैँले नै गोली हान्न लगाएको प्रहरीले पत्रकार सम्मेलनमार्फत जानकारी दियो ।
विराटनगरमा पत्रकार सम्मेलन गर्दै एसपी अरुणकुमार बिसीले श्रीनिवासकै निर्देशनमा गोली हानेको पाइएको जानकारी दिए ।  प्रहरीका अनुसार देश र हिन्दु धर्मको लागी आचार्य श्रीनिवासले आफुलाई हातमा गोली हान्न आदेश दिएका थिए । तर गोली हान्ने माधवले आचार्य श्रीनिवासलाई छातीमा गोली प्रहार गरेको बताइएको छ ।
आचार्य श्रीनिवासको काठमाडौंमा  उपचार भएको थियो । उनलाई सोमबार काठमाडौंबाट पक्राउ गरेर विराटनगर लगिएको थियो ।  प्रहरीले आचार्य श्रीनिवाससँगै चौधरी र अधिकारीलाई पनि सार्वजनिक गरेको छ ।
भागवत वाचनको लागि गएका आचार्यमाथि जतुवामा गोली हानिएको थियो ।
धर्मशालामा बास बसेको बेला राति पौने २ बजे मोटरसाइकलमा आएका दुईजनाले गोलीहानेर फरार भएको बताइएको थियो । भागवत पुराण आयोजक समितिकी संयोजक अनिता ढकाल (यादव) ले छानबिनका लागि भन्दै उजुरी दर्ता गराएकी थिइन् ।  बारा जिल्ला सिमरा ३ घर भई सुनसरीको बराह नगरपालिका वडा न ६ स्थित आश्रममा बस्दै आएका २४ बर्षीय आचार्य श्रीनिवासले देशमा हिन्दुराज्य स्थापनाका लागि आफैँलाई गोली हान्न निर्देशन दिएको बताइएको छ ।
केहि समयअघि आफुलाई क्रिश्चियन धर्मावलम्बीहरुले धम्की दिएको भन्दै सुरक्षा माग गरेका थिए ।