काठमाडौं । काठमाडौंमा जारी गरिएको निषेध आदेश (निषेधाज्ञा)ले फागुपूर्णिमा (होली) पर्व मनाउन बाधा नपर्ने प्रशासनले स्पष्ट पारेको छ । तर, निषेधित क्षेत्रमा भेला भई विरोध गर्न पाइँदैन ।

जिल्ला प्रशासन कार्यालय काठमाडौंले राष्ट्रपति र उपराष्ट्रपतिको कार्यालय, प्रधानमन्त्रीको सरकारी निवास बालुवाटार, सिंहदरबार र नयाँ बानेश्वरस्थित संघीय संसद् भवन क्षेत्रमा आइतबार (फागुन २५)देखि दुई महिनासम्मका निम्ति निषेधाज्ञा जारी गरेको छ । यो निषेधाज्ञा विगतकै निरन्तरता भएको काठमाडौंका प्रमुख जिल्ला अधिकारी (सीडीओ) ऋषिराम तिवारीले बताए ।

“त्यहाँ (निषेध आदेश) उल्लिखित कार्यक्रम निषेधित क्षेत्रमा गर्न पाइँदैन । यो नयाँ होइन, यसअघि पनि हुने गरेको थियो,” उनले बाह्रखरीसित भने, “विगतकै निरन्तरता हो ।”

• प्रशासनले गर्‍यो काठमाडौंका यी स्थानमा दुई महिनासम्म जुलुस, सभा निषेध

संवेदनशील ती पाँच क्षेत्रमा पाँचजनाभन्दा बढी भेला भई कुनै पनि प्रकारका विरोधका कार्यक्रम गर्न नपाइने उनले स्पष्ट पारे । यीबाहेकका क्षेत्रमा निषेधाज्ञा आकर्षित नहुने उनले बताए ।

धार्मिक, सांस्कृतिक चाडपर्व मनाउन निषेधाज्ञाले नछेक्ने उनले जानकारी दिए । तर, त्यस नाममा उल्लिखित स्थानमा विरोध जुलुस, धर्ना गर्न नपाइने उनले बताए ।

“विगतदेखि चल्दै आएको सामाजिक, सांस्कृतिक पर्व मनाउन फरक पर्दैन,” सीडीओ तिवारीले भने, “होली मनाउन रोक लगाइएको छैन । त्यो कुरा सूचना पढ्दा पनि स्पष्ट हुन्छ ।”

निषेधाज्ञा जारी गरिएको क्षेत्रमा मठमन्दिर परेको अवस्थामा त्यहाँ धार्मिक कार्य गर्न बाधा नपर्ने उनले स्पष्ट पारे ।

यो वर्ष फागुन २९ र चैत १ गते होली पर्व मनाइँदै छ । फागुन २९ गते काठमाडौंसहित पहाडी र हिमाली जिल्लामा होली मनाइनेछ । चैत १ गते तराईमा होली मनाइँदै छ ।