बीबीसी । पूर्व गुप्तचर अधिकारीमाथि रासायनिक हमला गरेको आरोपमा पश्चिमका धेरै देशहरुले घटनाको विरोध गर्दै १०० भन्दा बढी रुसी अधिकारीलाई देशनिकाला गरिसकेका छन् । यसैबीच आइसल्यान्ड र बेलायतले भने रुसको आयोजनामा हुने आगामी विश्वकप फुटबल कार्यक्रममा उच्च प्रतिनिधिको टोली नपठाउने निर्णय सुनाएका छन् । त्यसैगरी पहिलोपटक बेलायतको राजपरिवारले पनि विश्वकपमा सहभागीता नजनाउने भएको बताइएको छ ।
बेलायतमा पूर्वरुसी एजेन्टमाथि भएको रासायनिक हमलापछि रुस अहिले सबैतिरबाट आलोचित भइरहँदा यसको असर आगामी गर्मीयाममा सुरु हुने विश्वकप फुटबलमा पनि परिरहेको देखिएको छ । यसै विषयमा रुसी विदेश मन्त्रीकी प्रवक्ता मारिया जाकहारोभाले अमेरिका र बेलायतमाथि विश्वकप कार्यक्रममा अवरोध पुर्याउन खोजिरहेको आरोप लगाएकी छन् । रुसी टेलिभिजनसँगको अन्तर्वार्तामा उनले अहिले पश्चिमी राष्ट्रहरुको मुख्य लक्ष्य नै रुसबाट विश्वकपलाई हटाउनु रहेको बताएकी हुन् ।
बेलायतका विदेश मन्त्री बोरिस जोन्सनले पनि रुसमा हुने विश्वकपलाई १९३६ को जर्मनीको नाजी ओलम्पिकसँग तुलना गर्दै कार्यक्रमको विरोध गरेका छन् । त्यसैगरी अर्का बेलायती राजनीतिज्ञले विश्वकप स्थगित गर्न वा रद्द गराउन आग्रह गरेका हुन् । तरपनि बेलायतले इङ्ल्यान्डको फुटबल टिम सम्बन्धि भने यस प्रकारको कुनै औपचारिक जानकारी दिइसकेको छैन ।
हालै मात्र अमेरिकाले रुसका १७० राजनीतिज्ञलाई देशनिकाला गरेपछि उनीहरु परिवार सहित वासिङटनबाट बाहिरिएका हुन् । त्यसैको प्रतिक्रियामा रुसले पनि ५० बेलायती अधिकारीलाई बर्खास्त गर्ने निर्णय सुनाएको छ ।
बेलायतले प्रतिबन्धित रासायनिक हतियार प्रयोग गरेको दाबी गरिरहँदा रुसले भने यसबारे पुष्टि नभइ कुनैपनि कारबाही अगाडि बढाउनु उचित नहुने बताउँदै आएको छ । तर यही मुद्दाले आगामी विश्वकपमा समेत ठूलो असर पार्ने देखिएपछि रुस र बेलायतबीचको विवाद झन गम्भीर बन्दै गइरहेको बताइएको छ ।
http://www.bbc.com/news/world-europe-43609505