काठमाडौं । धनगढीमा आयोजना हुने सर्वाधिक पुरस्कार राशिको रुस्लान धनगढी प्रिमियर लिग (डीपीएल)  क्रिकेटको खेल तालिका सार्वजनिक भएको छ । आयोजक धनगढी क्रिकेट एकेडेमी (डीसीए) र सुदुरपश्चिमाञ्चल एकेडेमी (एसपीए) ले बुधबार दोस्रो संस्करणको डीपीएल क्रिकेटको खेल तालिका सार्वजनिक गरेको हो  ।

डीपीएल क्रिकेटको यो संस्करण चैत १७ गतेबाट सुरु हुँदैछ । यो संस्करणमा विराटनगर किङ्गस, काठमाडौं गोल्डेन्स, सीवाईसी अत्तरिया,  रुपन्देही च्यालेन्जर्स, महेन्द्रनगर युनाइटेड र टिम चौराहा धनगढीले सहभागिता जनाएका छन् । प्रतियोगिताको लागि अक्सनबाट सबै  टोलीले खेलाडी छनोट गरिसकेको छ ।

धनगढीस्थित अञ्चल प्रहरी मैदानमा हुने उद्घाटन खेलमा टिम चौराहा धनगढी र काठमाडौं गोल्डेन्सबीच प्रतिस्पर्धा हुनेछ । वैशाख १ गतेसम्म संचालन हुने प्रतियोगिताको पहिलो दिन एक खेल हुने छ । दोस्रो दिनबाट प्रत्येक दिन दुई खेल हुने खेल तालिका आयोजकले सार्वजनिक गरेको छ ।

टी–ट्वान्टी फरम्याटमा हुने दोस्रो संस्करणको डीपीएलको विजेताले २५ लाख नगद पाउनेछ । त्यस्तै, उपविजेताले १० लाख, तेस्रोले ३ लाख र चौथोले २ लाख नगद प्राप्त गर्ने छन् । 

प्रतियोगिताको लिग चरणमा पत्येक टिमले अन्य टिमसँग १–१ खेल खेल्ने छन् । शीर्ष चारमा पर्ने टिम प्लेअफमा पुग्ने छन् । त्यसमा पहिलो र दोस्रो हुने टिमबीचको खेलबाट विजेता टिम फाइनलमा पुग्ने छ । पराजित हुने टिम तेस्रो र चौथो हुने टिमसँगको विजेतासँग फाइनल प्रवेशका लागि खेल्ने छन् ।