काठमाडौं । नर्भिक अस्पतालका चिकित्सकले गरेको गल्तीका विषयमा नेपाल मेडिकल काउन्सिलले छानबिन गर्ने भएको छ । काउन्सिलमा ‘आईतबार बसेको इथिकल कमिटी’को बैठकले छानविन गरी कारवाही गर्ने निर्णय गरेको हो ।
शल्यक्रियामा संलग्न डा. प्रवीण नेपाल र डा.शैलेज रञ्जितकारलाई घटनाको लिखित जानकारीसहित मंगलबार काउन्सिलमा बोलाएको काउन्सिलका रजिस्ट्रार डा. दीलिप शर्माले बताए ।
उनले भने ‘अस्पतालमा उक्त घटना कसरी भयो भन्ने विषयमा लिखित जवाफसहित शल्यक्रियामा संलग्न डाक्टरलाई मंगलबार काउन्सिलमा बोलाएका हौं ।”
चितवनकी बिन्दु पौडेलको लिगामेन्ट च्यातिएको बायाँ घुँडाको शल्यक्रिया गर्नुपर्नेमा दायाँ घुँडाको शल्यक्रिया गरिएको भन्दै शल्यक्रियामा संलग्न चिकित्सकले गल्ती स्वीकार गरेका थिए ।
चिकित्सकले गल्ती भएको स्वीकार गरेपछि अस्पतालले बिरामीका आफन्तसँग सहमति गरेको थियो ।
बिरामी पौडेलको दुवै खुट्टाको निःशुल्क उपचार गर्ने, उपचारमा लागेको खर्च मिनाहा गर्ने, विज्ञ चिकित्सकका आधारमा सबै उपचार अस्पतालले गरिदिने सहमति विरामीसँग अस्पतालले गरेको थियो ।