काठमाडौं । दुई पटक निर्वाचन सरेर असोज २ गते हुन लागेको प्रदेश नं. २ को निर्वाचनमा स्थानीय तह थपिँदा तयारीमा चुनौती थपिएको छ ।
सरकारले जेठ ९ गते प्रदेश नं १, २, ५ र ७ मा स्थानीय तह थप गर्ने निर्णय गरेको थियो । उक्त निर्णयविरुद्ध सर्वोच्च अदालतमा मुद्दा परेपछि कार्यान्वयन हुन सकेको थिएन ।
हालै सर्वोच्चले स्थानीय तह चुनाव हुन बाँकी २ नम्बर प्रदेशमा सरकारले संख्या थप गर्न सक्ने गरी निर्णय गरेपछि चुनाव हुन १ महिना बाँकी रहँदा सरकार र निर्वाचन आयोगलाई तयारीमा समस्या परेको हो ।
यसअघि १२७ स्थानीय तह रहेको प्रदेश नं. २ का ८ जिल्लामा ९ स्थानीय तह थपिएपछि मतदाता नामावली र मतदाता परिचयपत्र पुनः छाप्नुपर्ने भएको आयोगका प्रवक्ता सूर्यप्रसाद शर्माले जानकारी दिए ।
जसका लागि सरकारले तत्काल थपिएका स्थानीय तहमा कार्यालय स्थापना गर्नुपर्ने अर्को चुनौती छ । शर्माले तत्काल थपिएका स्थानीय तहको कार्यालय खोल्नुपर्ने बताए ।
स्थानीय विकास मन्त्रालयका प्रवक्ता रुद्रसिंह तामाङले यसबारे मन्त्रालयले तयारी गरिरहेको र केही दुई दिनमै कार्यालय स्थापना हुने जानकारी दिए ।
उक्त प्रदेशमा यसअघि निर्धारण गरिएका २ हजार १३७ मतदान स्थल तथा ३ हजार ५६७ मतदात केन्द्र पनि परिवर्तन हुन सक्ने आयोगले जनाएको छ । २ नम्बर प्रदेशमा २६ लाख ६४ हजार ७९२ मतदाता रहेका छन् ।
