काठमाडौं । सरकारले अवैधरूपमा उत्खनन् गरिरहेको ढुंगाखानी बन्द गरेसँगै देशभरका विभिन्न स्थानको सडक निर्माणमा त्यसको असर परेको छ ।

काठमाडौं उपत्यकालगायत देशभरका विभिन्न सडक निर्माण अवरुद्ध बन्न पुगेको सडक विभागले जनाएको छ ।

निर्माण सामग्रीको समस्या समाधानका लागि पहल भइरहेको विभागका महानिर्देशक केशवकुमार शर्माले बताए । उनले निर्माण सामग्री कुन–कुन स्थानमा र कसरी निकाल्ने भनी कार्यविधि बनिरहेको बताए । उनले भने, ‘‘त्यो आएपछि मात्रै सडक निर्माण सञ्चालन हुनसक्छ ।’’

निर्माण सामग्रीको अभाव झन्डै दुई महिनापहिले सुरु भएको हो । निर्माण सामग्री अभावले काठमाडौं उपत्यकाका विस्तारित र निर्माणका क्रममा रहेका सडक अवरुद्ध बनेको विभागले जनाएको छ ।

कतिपय सडक पुससम्ममा सम्पन्न गर्ने लक्ष्य राखिए पनि निर्माण सामग्री नहुँदा नसकिने अवस्था आएको काठमाडौं उपत्यका सडक विस्तार आयोजनाले जनाएको छ ।

काठमाडौं उपत्यकामा मात्रै ढुंगाखानी बन्द भए काभ्रेपलाञ्चोक वा धादिङको विकल्प खोज्न सकिने भए पनि देशभर ठप्प भएकाले निर्माण अघि बढाउन नसकिएको आयोजना प्रमुख गुरु अधिकारीले जानकारी दिए । उनले भने, ‘‘एक–दुई हप्तामा सकिने काम पनि उसै रहेको छ ।’’

लामो समयसम्म कोभिड–१९ को संक्रमणका कारण सडक निर्माणमा असर गरेकामा संक्रमण कम हुँदै गर्दा देशभर निर्माण अघि बढिरहेको थियो ।

गत आवमा नै सम्पन्न गर्ने लक्ष्य राखिएका सडकमध्ये कतिपय कोभिडकै कारण सम्पन्न हुन सकेनन् । अहिले ती सडकको निर्माण अघि बढाइएको भए पनि निर्माण सामग्री अभावको समस्या थपिएको छ । निर्माण सामग्रीको अभाव राष्ट्रिय राजमार्गदेखि स्थानीय सडक निर्माणमा समेत पर्न थालेको देख्न सकिन्छ । रासस

फाइल तस्बिर ।