काठमाडौं । भौतिक योजना तथा यातायातमन्त्री वसन्त नेम्वाङ र सहरी विकासमन्त्री कृष्णगोपाल श्रेष्ठले चन्द्रागिरि नगरपालिकाको विकास निर्माणको योजनाको अवलोकन गरेका छन् । दुवै मन्त्रीले शुक्रबार निर्माणाधीन अवस्थामा रहेको तीनथाना र कीर्तिपुर जोड्ने निर्माणाधीन पुल र चन्द्रागिरि नगरपालिका १५ मा निर्माणाधीन भेराडिल खाइके साकुरा पार्कको अवलोकन गरेका हुन् ।

अवलोकनको क्रममा मन्त्रीद्वयले एक वर्षदेखि सुस्त भइरहेको तीनथाना-कीर्तिपुर जोड्ने पुलको निर्माण द्रुत गतिमा गर्न निर्देशन दिए । सो अवसरमा निर्माण कम्पनीका प्रतिनिधि र आयोजनाका इन्जिनियरले यो वर्षको अन्त्यसम्ममा पुलको निर्माण भइसक्ने जानकारी गराए ।

मन्त्री नेम्वाङले कुनै पनि बहानाबाजी नगरी यो वर्षको अन्त्यसम्मका शिलान्यास गर्ने गरी तयार गर्न निर्देशन दिएका थिए । सहरी विकासमन्त्री श्रेष्ठले पनि नयाँ वर्षसँगै पुलको शिलान्यास भइसक्नेगरी तयार गर्न निर्देशन दिए । “२०७८ सालअघि उद्घाटन गर्ने गरी द्रुतगतिमा काम गर्नुस् । कामदार कम देखिएको छ, जुनसुकै हालतमा यो वर्ष नकटाउनुस्,” निर्देशन दिने क्रममा मन्त्री श्रेष्ठले भने ।

पार्कको अवलोकन गर्दै मन्त्रीद्वयले भिरालो र डरलाग्दो स्थानमा पार्क निर्माण गरेर वडा र स्थानीयले साहसी काम गरेको बताए । भिरालो र पहिरो जाने क्षेत्रलाई व्यवस्थित गरी २७ रोपनी क्षेत्रफलमा निर्माण गरिएको पार्क चन्द्रागिरि नगरपालिका १५ को गौरवको योजना भित्र पर्छ । पार्कको बारेमा जानकारी गराउँदै वडाध्यक्ष उत्तमबहादुर रावतले पार्कको गुरुयोजना तयार गरी थप विकास गर्नुपर्ने बताए । उनका अनुसार पार्कमा जापानबाट ल्याइएको ५० वटा साकुरा फूलका बोट छन् ।

पार्कभित्र जिपलाइन, स्पाइरल स्टेयर, थियटर, मिनी रेललगायत मनोरञ्जनका सामाग्री तयारी गर्ने काम अघि बढाइएको छ । 

सोही अवसरमा विष्णुदेवी मन्दिरको विकास निर्माण र गुरुयोजनाको विषयमा छलफल गर्न सहरी विकास मन्त्रालयका सचिव र उच्च स्तरीय टोलीसहित विष्णुदेवी मन्दिर परिसर पुगेका मन्त्री श्रेष्ठले ऐतिहासिक विष्णुदेवी मन्दिरको गुरुयोजना तयार गरी विकास निर्माणको कामलाई अघि बढाउनुपर्ने बताए । खोलाको दोभान, घाट, बाँध निर्माणलगायत विषय समेटेर गुरुयोजना बनाइ अघि बढ्नुपर्ने उनको भनाइ थियो ।

मन्त्री श्रेष्ठले तीनथाना गढी र बुद्धपार्कको निरीक्षण गरी सबै क्षेत्रलाई व्यवस्थित रुपमा विकास गर्ने प्रतिबद्धता जनाएका छन् । अवलोकन भ्रमणमा सहरी विकास मन्त्रालयका सचिव रमेशप्रसाद सिंह, वाग्मती सभ्यता एकीकृत विकास समितिका कार्यकारी अधिकृत नवराज प्याकुरेलसहितको मन्त्रालयको उच्च स्तरीय टोली सहभागी भएका थिए ।