काठमाडौं । सरकारले विदेशबाट नेपाली नागरिकको उद्धार उडान स्थगित गरेको छ ।   कोडिभ १९ का कारण विदेशमा विभिन्न ठाउँमा अलपत्र परेका नेपालीलाई उद्धार उडानमार्फत दैनिक ५ सयको संख्या नबढाइ ल्याउने निर्णय सरकारले गरेको थियो ।  तर, कोरोनाको संक्रमण फैलिँदै गएको र विभिन्न जिल्लामा लकडाउन लगाएकाले केही दिनका लागि उद्धार उडान पनि रोकिएको नेपाल नागरिक उड्डयन प्राधिकरण स्रोतले जानकारी दियो । 

“काठमाडौंमा पनि कोरोनाको संक्रमण जोखिम बढ्दै गएको र यस्तो अवस्थामा ल्याउँदा होटलमा राख्नु पर्दा नागरिकलाई महङ्गो पर्ने भएकाले तत्कालका लागि स्थगन गर्ने निर्णय सीसीएमसीले गरेको हो,” पर्यटन मन्त्रालयका एक अधिकारीले भने ।

उनका अनुसार कतिदिनसम्म उद्धार उडान रोक्ने यकिन जानकारी आएको छैन । यता, सीसीएमसीको उक्त निर्णयसँगै नेपाल वायुसेवा निगमले पनि अगष्ट १८ देखिको उद्धार उडान तालिका अनिश्चितकालसम्मका लागि स्थगित गरेको जनाएको छ ।