काठमाडौं । म्यानचेस्टर युनाइटेडका कप्तान वायन रुनीले क्लबका लागि सर्वकालिन सर्वाधिक गोलकर्ताको नयाँ कीर्तिमान बनाएका छन् । इंग्लिश प्रिमियर लिग अन्तर्गत शनिबार राति स्टोक सिटीविरुद्धको खेलमा गोल गर्दै कप्तान रुनीले क्लबका लागि सर्वाधिक गोल गर्ने खेलाडीको कीर्तिमान बनाएका हुन् ।
लिग अन्तर्गत २२ औ चरणको लिग खेल खेल्न म्यानचेस्टर युनाइटेड स्टोक सिटीको घरेलु मैदानको भ्रमणमा गएको थियो । उक्त खेलमा आत्मघाती गोलको कारण पराजय नजिक पुगेको म्यानचेस्टर युनाइटेडका लागि इन्जुरी समयमा रुनीले गोल गर्दै खेल बराबरीमा ल्याए ।
र, इन्जुरी समयमा फ्रिकिकबाट उत्कृष्ट गोलका रुनीले सर्वकालिन सर्वा्धिक गोलकर्ताको किर्तिमान समेत बनाएका हुन् ।
स्टोकबिरुद्ध अन्तिम समयमा गोल गरेसंगै रुनीले म्यानचेस्टर युनाइटेडका लागि २५० औं गोल गर्दै कीर्तिमान कायम गरे । रुनीले सर बबी चार्लटनले ४४ बर्षअघि बनाएको कीर्तिमानलाई भंग गर्दै नयाँ कीर्तिमान बनाएका हुन् ।
चार्लटनले म्यानचेस्टर युनाइटेडका लागि २४९ गोल गर्दै कीर्तिमान बनाएका थिए । सन् २००४ मा १८ वर्षको उमेरमा एभर्टनबाट युनाइटेड आएका ३१ बर्षिय रुनीले पाँच सय ४६ औं खेलमा यो किर्तिमान बनाएका हुन् ।
यस्तै रुनीको एक गोल मद्दतमा म्यान्चेस्टर युनाइटेडले स्टोकलाई उसैको घरेलु मैदानमा १ – १ गोलको बराबरीमा समेत रोक्न सफल भएको छ ।
खेलको १९ औं मिनेटमा बल क्लियर गर्ने क्रममा हुवान माटाले आत्मघाती गोल गरेपछि स्टोक सिटीले खेलमा अग्रता लियो । तर, क्लबका लागि सर्वकालीन गोलकर्ता बनेका रुनीले म्यानचेस्टर युनाइटेडलाइ हारबाट बचाए ।
यो बराबरीसँगै म्यानचेस्टर युनाइटेडले २२ खेलबाट ४१ अंक बनाएको छ । र, म्यानचेस्टर युनाइटेड लिगको छैटौ स्थानमा छ । २८ अंक जोडेको स्टोक लिगको नवौं स्थानमा छ ।