बजेट आउनुअघि नेपाली कांग्रेसको समर्थनमा पुष्पकमल दाहाल ‘प्रचण्ड’ प्रधानमन्त्री बन्ने निश्चितप्रायः भएको अवस्थामा पनि जोगिएका प्रधानमन्त्री केपी शर्मा ओलीको सरकार बजेट जारी गर्नेबित्तिकै फेरि हल्लिएको थियो । एनेकपा (माओवादी)बाट नेकपा (माओवादी केन्द्र) बनेको दलका अध्यक्ष दाहाल प्रधानमन्त्री बन्नुपर्छ भन्ने लहर फेरि चल्यो । एमाले र माओवादीबीच भएको भद्र सहमति लागु हुनुपर्छ भन्ने ठूलै माग भयो तर त्यो डाँको पनि फासफुस भएको छ । अब ओलीको सरकार अझै केही महिना सहज ढंगले चल्ने देखिएको छ । आजको नयाँ पत्रिकाले सरकारको आयुको विषयमा राम्रो मुख्य समाचार बनाएको छ ।

नयाँ पत्रिकाअनुसार सरकारको आयु लम्मिनुमा सबैभन्दा प्रमुख कारण अहिले राष्ट्रिय सरकार बन्नसक्ने सम्भावना नहुनु नै हो । माओवादी र एमालेबीच राष्ट्रिय सरकार बन्ने अवस्थामा प्रचण्डलाई नेतृत्व दिने विषयमा सहमति भएको तर हाललाई सो अवस्था नरहेकाले प्रधानमन्त्री केपी शर्मा ओलीको पदावधि लम्मिने संभावना बढेर गएको छ । त्यस्तै बजेटअघि सरकार फेर्ने क्रममा माओवादीले अन्तिममा आएर धोका दिएका कारण माओवादी र नेपाली कांग्रेसबीच अविश्वासको खाडल बढेर गएको छ । त्यसले गर्दा पनि प्रचण्डको सरकार बन्ने संभावना कम भएको हो । त्यस्तै, एमालेले सरकार नछाड्ने मनःस्थिति बनाएको विषयलाई पनि नयाँ पत्रिकाले एक बुँदा बनाएको छ । सरकारमा भएको दलले नेतृत्व छाड्न नचाहनु त्यसै पनि स्वाभाविकै हो ।
त्यस्तै, सरकारमा भएका माओवादीका नेताहरूले पनि अहिले सरकार छाड्ने मनःस्थिति नदेखाएको नयाँ पत्रिकाको बुझाइ छ । सरकारमा माओवादीका नेतृत्वकर्ता उपप्रधानमन्त्री टोपबहादुर रायमाझीले राष्ट्रिय सहमति कायम नहुन्जेल यही सरकार रहने भनेर बोलेको विषयले पनि सरकारमा बस्ने माओवादी नेताको भावना प्रतिनिधित्व गरेको छ । नयाँ पत्रिकाअनुसार अहिले सरकार टिकाउने विषयमा एमाले पुनः एकजुट भएको कारणले पनि सरकारको आयु बढेको हो । यसै समाचारमा नेपाली कांग्रेसको धारणा प्रस्तुत हुने समाचार पनि नयाँ पत्रिकाले प्रकाशित गरेको छ । कांग्रेस सभापति शेरबहादुर देउवा निकट नेता डा. प्रकाशशरण महतका अनुसार जबसम्म ओली सरकार अल्पमतमा पर्दैन तबसम्म नयाँ समीकरणको विषयमा नजान सभापति देउवालाई पार्टीभित्रै ठूलो दबाब रहेको छ ।

यसै सन्दर्भमा आजको गोरखापत्रले पनि दुई कोलमको मुख्य समाचार प्रकाशित गर्दै प्रधानमन्त्री ओलीले नेपालगन्ज विमानस्थलमा पत्रकारसँग गरेको कुराको विवरण पेस गरेको छ । गोरखापत्रका अनुसार प्रधानमन्त्रीले देशको राजनीतिक स्थायित्व र संविधान कार्यान्वयनका लागि राष्ट्रिय सहमतिको सरकार चाहिने भनेका छन् । एकातिर राष्ट्रिय सरकार भएको खण्डमा प्रचण्डको नेतृत्व हुने भनेर प्रचार भइरहेको छ भने ओलीले वर्तमान सरकारलाई नै राष्ट्रिय सहमतिको सरकारको स्वरूप दिने कोसिस भइरहेको बताएका छन् । अर्थात्, आउँदो स्थानीय निर्वाचन र संसदीय निर्वाचनसम्म ओलीले पदबाट नहट्न भरमग्दुर कोसिस गर्ने अवस्था देखिएको छ ।

समाचार आकाशमा चम्किए अम्बर

नेपाली सांगितिक क्षेत्रमा अतुलनीय योगदान गरेका वरिष्ठ संगीतकार अम्बर गुरुङ कसरी नेपाली जनताको मन र मस्तिष्कमा न्यानोस्थान ओगटेर बसेका रहेछन् भन्ने आजका दैनिक पत्रिकामा उनको मृत्युको समाचारलाई दिइएको महत्वबाट स्पष्ट भएको छ ।

आजको कान्तिपुरले नेपालका राष्ट्रकवि माधवप्रसाद घिमिरेलाई अम्बर गुरुङको विषयमा बोल्न लगाएर गहकिलो श्रद्धाञ्जली अर्पण गरेको छ । कृष्ण गोपालले बनाएको श्याम श्वेत स्केचलाई पृष्ठको एक चौथाई स्थान दिएर राष्ट्रकवि घिमिरेको भनाइ र देवेन्द्र भट्टराईको समाचारमूलक श्रद्धाञ्जलीले कान्तिपुरको कभरेज उत्कृष्ट देखिएको छ ।

कान्तिपुरले अम्बर गुरुङलाई सात कोलम स्थान दिएको छ भने अन्नपूर्ण पोस्ट तथा हिमालय टाइम्सले गुरुङको महाप्रस्थानलाई आठ आठ कोलमको समाचार बनाएका छन् । यी दुवै दैनिकले आफ्नो प्रथम पृष्ठमा अरु कुनै समाचारलाई स्थान दिएका छैनन् । हिमालय टाइम्स तथा अन्नपूर्ण पोस्ट दुवैले गुरुङको पार्थिव शरीरको तस्विर प्रकाशित गरेका छन् । राजधानीले पनि पार्थिव शरीरकै तस्विर प्रकाशित गरेर ६ कोलममा समाचार विस्तार गरेको छ । राजधानीले प्रधानमन्त्रीद्वारा व्यक्त दुःखलाई बक्स बनाएर प्रकाशित गरेको छ ।

कान्तिपुरले मुख्य समाचार राष्ट्रकविले व्यक्त गरेको सम्झनालाई बनाएको छ भने अन्नपूर्ण पोस्टले अर्का प्रवासी साहित्यकार पिटर जे. कार्थकको लेखलाई मुख्य समाचार बनाएको छ । कार्थकले अम्बर गुरुङलाई नेपाली संगीतका ‘माइस्ट्रो’ भनेका छन् ।

नागरिकमा देवेनले बनाएको रंगिन स्केच सहित दीपेन्द्र लामाले संगीतज्ञ अम्बर गुरुङप्रति श्रद्धाञ्जली समाचार लेखेका छन् । लामाका अनुसार गुरुङले नेपाली संगीतलाई पूर्वीय शास्त्रीय संगीत र पाश्चात्य संगीतका संरचना र प्रविधि थपेर अझ परिष्कृत गरे । नागरिकले जस्तै गोरखपत्रले पनि गुरुङको समाचार ६ कोलममा विस्तार गरेको छ । गोरखापत्रले पनि कलाकार केशवको स्केच र पार्थिक शरीरमा गुरुङकी पत्नीले अन्तिम श्रद्धाञ्जली अर्पण गरेको फोटो समानान्तरूपमा प्रकाशित गरेको छ ।

संगीतज्ञ गुरुङको समाचारलाई नयाँ पत्रिकाले प्रथम पृष्ठमा अन्य पत्रिकाले भन्दा कम स्थान दिएको छ । दुई कोलममा प्रकाशित समाचारमा गुरुङका सुपुत्र किशोर गुरुङले आफ्ना पिताको अर्केस्टा बनाउने सपना पूरा गर्ने संकल्प गरेको समाचारलाई नयाँ पत्रिकाले बक्स बनाएको छ ।

मृत्यु सादा कि रंगीन?

कुनैपनि विशिष्ट व्यक्तिको मृत्यु हुँदा न्युजरुममा उनको तस्बिर वा स्केच रंगीन गर्ने कि श्यामश्वेत बनाउने भन्ने छलफल हुनेगर्छ । वास्तवमा मृत्युलाई शोकमय, गम्भीर र अत्यन्त असामयिक सोच्ने हो भने त्यस्तो भावनाअनुरूप श्यामश्वेत तस्विर नै ठीक देखिन्छ । कुनै अत्यन्त ठूलो प्रतिभाको सानै उमेरमा मृत्यु भयो, दुर्घटनाबाट मृत्यु भयो वा हत्या भयो भने श्यामश्वेत तस्बिरले भाव झल्काउँछ । तर कुनै प्रतिभा पूर्णरूपमा प्रस्फुटित भएर जीवनको उत्तराद्र्धमा पुगेर देहत्याग गर्छन् भने त्यस्तो अवस्थामा उनको महानिर्वाणलाई उज्यालो रूपमा पनि संझिन सकिन्छ भन्ने सोच पनि उत्तिकै सान्दर्भिक हुनसक्छ । अम्बर गुरुङको मृत्युमा पनि नेपाली पत्रिका यही विषयमा विभाजित भएको देखिन्छ । कान्तिपुर र नयाँ पत्रिकाले श्यामश्वेत स्केच प्रकाशित गरे भने गोरखापत्रले स्केच श्यामश्वेत तर तस्विर रंगीन प्रकाशित ग¥यो । नागरिकले स्केच नै रंगिन बनायो भने हिमालय टाइम्स, राजधानी तथा अन्नपूर्ण पोस्टले रंगीन तस्विरलाई मुख्य बनाएका छन् ।

सम्पादकीय

आज समीक्षित दैनिक पत्रिकामध्ये अन्नपूर्ण पोस्ट, कान्तिपुर, नागरिक, राजधानी तथा हिमालय टाइम्सले संगीतकार अम्बर गुरुङले नेपाली सांगीतिक क्षेत्रमा दिएको योगदानको चर्चा गरेर सम्पादकीय लेखेका छन् । यसरी देशका एक उज्वल नक्षत्रलाई नेपाली पत्रकारिता क्षेत्रले एक समान इज्जत दिएकाले यो क्षेत्रमा लाग्ने सम्पूर्ण कलाकारलाई सम्मान महसुस हुने र आफ्नो क्षेत्रमा थप लाग्न सकारात्मक ऊर्जा प्राप्त हुन्छ । सबै पत्रिकाको यो विशेष लगावलाई नेपाली पाठकले साधुवाद अर्पण गरेको हुनुपर्छ ।

आजका गोरखापत्र तथा नयाँ पत्रिकाले अम्बर गुरुङमाथि सम्पादकीय लेखेका छैनन् । गोरखापत्रले दुर्घटनाविरुद्ध सामूहिक प्रयासको महत्वमा प्रकाश पार्दै सम्पादकीय लेखेको छ भने नयाँ पत्रिकाले बैंक तथा वित्तीय संस्था ऐनमा ‘स्वार्थको द्वन्द्व’ देखिएको विषयमा सम्पादकीय लेखेको छ ।