काठमाडौं । नयाँ शक्ति पार्टी नेपालका संयोजक एवं पूर्वप्रधानमन्त्री डा. बाबुराम भट्टराईले आफूलाई देश कसरी समद्ध बनाउने भन्नेमात्रै चिन्ता रहेको बताएका छन् ।
मंगलबार एक अपिल जारी गर्दै संयोजक भट्टराईले आफू मर्यादाक्रमको ख्याल नगरी नेपाल र नेपालीको समृद्धि र खुशीको लागि जस्तोसुकै जिम्मेवारीको भारी बोक्न जहिलेसुकै तयार रहेको बताएका छन् ।
''अब देश कसरी समृद्ध बनाउने भन्नेमात्रै चिन्ता छ, ' 'भट्टराईद्वारा जारी अपिलमा भनिएको छ, ''म मर्यादाक्रमको ख्याल नगरीकन नेपाल र नेपालीको समृद्धि र खुशीको लागि जस्तोसुकै जिम्मेवारीको भारी बोक्न जहिलेसुकै तयार छु, मलाई पूर्ण विश्वास छ, तपाईंहरुले नयाँ शक्ति पार्टी नेपालको चुनाव चिन्ह आँखामा मतदान गरी विकास र समृद्धिको नेतृत्व गर्ने जिम्मेवारी दिनुहुनेछ ।''
उनले नेपालको भूगोल निर्माण र अधिकार प्राप्तिको आन्दोलनको मुख्य दुई चरण पूरा भएको भन्दै अब आफूहरुलाई आर्थिक समृद्धिको नेतृत्व गर्ने जिम्मेवारी नेपालीहरुले दिनेमा विश्वास व्यक्त पनि गरेका छन् ।
उनले अगाडि भनेका छन्, ''तपाईंहरुकै प्रेम र सद्भावले म दुई पटकसम्म जनप्रतिनिधिका रुपमा संविधानसभामा गएँ । अर्थमन्त्री, प्रधानमन्त्री र संवैधानिक समितिका सभापति भएँ, म तपाईंहरुलाई धन्यवाद दिन चाहान्छु । यसबीचमा विकास निर्माणका केही कामहरु भए, तर मुख्य एजेन्डा संविधान निर्माणको थियो, हामी बढी त्यसमा केन्द्रीत भयौं । अब भने आर्थिक विकास र समृद्धिमा नै मुख्य जोड दिने पालो आएको छ । नेपालको भूगोल निर्माण र अधिकार प्राप्तिको आन्दोलनको मुख्य दुई चरण पूरा भयो । अब आर्थिक विकास र समद्धदिको चरण सुरु भएको छ । त्यसको जिम्मेवारी नयाँ शक्ति पार्टी नेपाल र मैले लिएको छु, यो वाचा म तपाईंहरुसँग गर्छ । मेरो पूर्ण विश्वास छ, तपाईंहरुले हामीलाई यो जिम्मेवारी दिनुहुनेछ ।''
