काठमाडौं । चलचित्र ‘दोख’को शीर्ष गीत सार्वजनिक गरिएको छ । ‘वन चरी उड्यो’ बोलको गीत शुक्रबार राजधानीमा एक कार्यक्रमबीच सार्वजनिक गरिएको हो । 

गीतमा नेपथ्य व्याण्डका मुख्य गायक अमृत गुरुङको स्वर छ । गुरुङले गाएको यो चलचित्रको पहिलो गीत हो ।

कार्यक्रममा बोल्दै गुरुङले भने, “चलचित्रमा गीत गाउँदिन भनेर बसेको थिएँ । नजिकको साथी अनुप बरालले आग्रह गरेपछि उसकै लागि दोखमा गीत गाएको हुँ ।” कवि तथा गीतकार श्रवण मुकारुङको शब्द, आभाषको संगीत रहेको गीतलाई नेपथ्य ब्याण्डले एरेन्ज गरेको हो । 

गीतले चलचित्रको कथा बोलेको छ । चलचित्रका अधिकांश कलाकारहरुलाई गीतमा प्रस्तुत गरिएको छ । 

अनुप बरालले निर्देशन गरेको चलचित्र असार २४ गतेबाट देशव्यापी प्रदर्शनमा आउँदै छ । 

चलचित्रको कथा राजन कठेतले लेखेका छन् ।

माओवादी द्वन्द कालखण्डमा सामुदायिक बनको मुद्धालाई लिएर दुईवटा गाउँबीचको किचलोको कथा प्रस्तुत गरिएको छ । 

चलचित्रमा दीया मास्के, मनिष निरौला, लोकमणि सापकोटा, माओत्से गुरुङ, रोय दिभ, राज थापा, सुरज मल्ल, कमल देवकोटा, साजन थापा मगरलगायत कलाकारको अभिनय छ ।